Իտալական լրատվամիջոցները հրապարակել են երկրի վարչապետ Սիլվիո Բեռլուսկոնիի հեռախոսազրույցների ձայնագրությունները, ինչի արդյունքում պարզվել է, որ վարչապետը նպատակ ունի հեռանալ երկրից, քանի որ Իտալիայում նրան բոլորը հետևում են:
Ինչպես հաղորդում է mignews.com կայքը` հեռախոսազրույցների ձայնագրությունները կապված են Նեապոլում սեպտեմբերի 1-ին ձերբակալված գործարար Ջանպաոլո Տարանտինիի հետ, ում դատախազությունը կասկածում է վարչապետին շանտաժի ենթարկելու մեջ: Նույն գործով կասկածվում է նաև Avanti պարբերականի գլխավոր խմբագիր Վալտեր Լավիտոլան, ով այս տարի հուլիսի 13-ին զանգահարել էր վարչապետին: Լավիտոլայի և Բեռլուսկոնիի միջև մոտ 10 րոպե տևած հեռախոսազրույցն էլ հրապարակվել է տեղական թերթերում:
Ըստ La Repubblica թերթի` հեռախոսազրույցի ժամանակ Լավիտոլան վարչապետին հարցեր էր հղել նախկին լրագրող Լուիջի Բիզինյանիի մասին, ով մեղադրվում է կոնֆիդենցիալ տեղեկատվություն հավաքելու և հետագայում տարբեր մարդկանց, այդ թվում` երկրի բարձրաստիճան ղեկավարներին շանտաժի ենթարկելու մեջ: Բեռլուսկոնին խմբագրի հարցերից մեկին պատասխանել է. «Նրանք ինձ հետևում են ամենուրեք, մի քանի ամսից ես կհեռանամ այս երկրից, որն ինձ մոտ սրտխառնոց է առաջացնում»: Սակայն երեկ երեկոյան Բեռլուսկոնին հայտարարել է, որ ոչ մի տեղ չի պատրաստվում հեռանալ և մնալու է, որպեսզի փոխի իր երկիրը:
