Տարեվերջին մեկ տարվա ձախողված նիստերից հետո Վանաձորի ավագանին վերջապես գումարեց արտահերթ նիստ և հաստատեց քաղաքի 2023 թվականի բյուջեն։ Մինչ այս նիստերը բոյկատում էին «Ասլանյան» դաշինքի ու «Հայրենիք» կուսակցության անդամները: Այս անգամ «Ասլանյան» դաշինքի երկու ավագանու անդամ ներկա եղան նիստին և կողմ քվեարկեցին համայնքային բյուջեին։ Ի վերջո, ավագանին համաձայնություն տվեց թվով 16 սուբվենցիոն ծրագրերի հայտերի:
Մինչ արտահերթ նիստի կայացումը, Վանաձոր համայնքի ավագանու «Հայրենիք» խմբակցության ղեկավար Վահե Դոխոյանը Վանաձոր համայնքի խմբակցություններին և ավագանու յուրաքանչյուր անդամի առաջարկել է ընդունել որոշում օրենքով սահմանված հնարավորինս սեղմ ժամկետներում Վանաձոր համայնքի ավագանու նոր ընտրություններ անցկացնելու մասին, իսկ դրանից հետո երկրորդ քայլով համատեղ քվեարկել Վանաձոր համայնքի բյուջեն հաստատելու օգտին։
«Առաջին լրատվական»-ի հետ զրույցում Վահե Դոխոյանը նշեց, որ արտահերթ նիստ գումարելով Վանաձորում քաղաքական ճգնաժամը չի հանգուցալուծվել. «Որովհետև հաստատվել է բյուջեից մի քանի տող, բայց դրանով համայնքը չի վերադարձել աշխատանքի իր բնականոն հունին: Այս պահին դեռ քաղաքական ճգնաժամ է, րչկա ընտրված քաղաքապետ, չկա մշտական գործող ավագանի, չեն ձևավորված հանձնախմբեր և այլն: Մենք շարունկում ենք պնդել, որ ստեղծված իրավիճակում ամենաճիշտ տարբերակն արտահերթ ընտրությունների գնալն է»,-ասաց նա:
Հարցին, թե արդյոք ավագանու այլ խմբակցություններն արձագանքել են իր կոչին, Դոխոյանը պատասխանեց. «Ինձ ոչ ոք կոնկրետ չի պատասխանել, բայց լրատվականներից պարզ դարձավ, որ կան ավագանու տարբեր անդամներ, որոնք նույնպես համամիտ են, որ այս ճգնաժամը վերջնական լուծելու ամենաճիշտ տարբերակը նոր ընտրություններն են: Իհարկե, ամենափայլուն տարբերակն այն կլինի, որ հանեն քաղաքապետ ընտրելու արգելանքը և ավագանին ընտրի քաղաքապետ: Դա կլինի ամենակարճ, ամենաարագ, ամենալեգիտիմ, ամենադեմոկրատ տարբերակը: Բայց քանի որ այս ամենն իշխանությունների կողմից արհեստականորեն ձգձգվում է և կարող է անվերջ ձգձգվել, որովհետև իշխանությունը հասկանում է, որ կարող է իր սրտին մոտ քաղաքապետ չընտրվի, դրա համար մենք մտածում ենք, որ ավելի լավ է գնալ նոր ընտրության, քան այս պրոցեսն անվերջ ձգվի»:
Անդրադառնալով քաղաքապետի պաշտոնակատար նշանակված Արկադի Փելեշյանին, ընդդիմադիր գործիչն ասաց. «Մենք Արկադի Փելեշյանի հետ 2012-ից գործընկերներ ենք եղել: Այստեղ ամբողջ խնդիրը ոչ թե Արկադի Փելեշյանն է, կամ մեկ այլ անձ, այլ այն, որ ՏԻՄ օրենքով համայնքի բնակիչն է իր ընտրությամբ որոշում, թե ով պետք է լինի իր քաղաքապետը: Քաղաքացին ընտրում է ավագանի, ավագանին ընտրում է քաղաքապետ: Այդ գործընթացը մեզ մոտ մնացել է անավարտ: Օրենքը պետք է մինչև վերջ իրացվի: Թող նշանակեն ընտրություն, թեկնածուներից մեկը կարող է լինել Արկադի Փելեշյանը, ում ավագանին կընտրի քաղաքապետ, թող նա էլ լինի քաղաքապետ: Մենք չենք ասել, որ եթե Մամիկոն Ասլանյանը չլինի, կամ ես չլինեմ, չենք աշխատի: Մենք ասել ենք,՝ երբ կլինի ընտրված համայնքի ղեկավար, այդ ժամանակ էլ կաշխատենք»: