Հույն քաղաքական գործիչները պետք է հրաժարվեն Անկարայի դեմ ուղղված «անզիջող և սադրիչ հռետորաբանությունից՝ ուղղված ներքին լսարանին»։ Աթենքը պետք է խոհեմ գործի, ինչպես վայել է ՆԱՏՕ-ի դաշնակցին՝ ձգտելով լուծել բոլոր խնդիրները երկխոսության միջոցով: Այս մասին հայտարարել է Թուրքիայի պաշտպանության նախարար Հուլուսի Աքարը՝ Վրաստանի և Ադրբեջանի պաշտպանական գերատեսչությունների ղեկավարների մասնակցությամբ եռակողմ հանդիպմանը, փոխանցում է Անադոլու գործակալությունը։
«Ցավոք սրտի, Հունաստանը շարունակում է էքսպանսիոնիստական և ագրեսիվ քաղաքականություն վարել՝ դիմելով սադրիչ գործողությունների և հռետորաբանության, որոնք անկայունություն են ստեղծում։ Ամեն օր նոր սադրանքներ են արձանագրվում. ընդամենը օրերս ՆԱՏՕ-ի ծրագրված զորավարժությունների ժամանակ Հունաստանի ռազմաօդային ուժերը փորձել են կասեցնել Թուրքիայի ռազմաօդային ուժերի անզեն կործանիչները, որոնք Դաշինքի առաքելությունն են իրականացրել: Իհարկե, անմիջապես պատասխան է տրվել»,- ասել է Աքարը:
Նրա խոսքով՝ Էգեյան ծովում ՆԱՏՕ-ի առաքելության նկատմամբ Հունաստանի «թշնամական քայլերը Դաշինքի հիմնադիր սկզբունքների անտեսման ցուցանիշ են»։ Միաժամանակ, Աքարն ընդգծել է, որ Անկարան բաց է երկխոսության համար Կիպրոսի, ինչպես նաև Էգեյան ծովում և Արևելյան Միջերկրական ծովում տիրող իրավիճակի վերաբերյալ, սակայն թույլ չի տա սադրանքներ «ոչ այսօր, ոչ ապագայում»։
Թուրքիան հանդես է գալիս տարածաշրջանում խաղաղության և կայունության օգտին, մինչդեռ Աթենքը ձգտում է ապակայունացման: Անկարան թույլ չի տա ոտնահարել իր իրավունքները և կիպրաթուրքերի շահերը տարածաշրջանում, վստահեցրել է նախարարը։
«Ավելացնեմ, որ Անկարան ՆԱՏՕ-ի մյուս դաշնակիցներից, հիմնականում՝ ԱՄՆ-ից, ակնկալում է չեզոք, օբյեկտիվ, ողջամիտ և տրամաբանական մոտեցում այս հարցին»,- հավելել է Աքարը։
