Այսօր «Առաջին լրատվական»-ի խմբագրություն զանգահարեց Երևանի Տպագրիչների 9 հասցևոմ բնակվող մի քաղաքացուհի` Բալասան Սաֆոյանը, ու տեղեկացրեց, որ նույն շենքում բնակվող քաղաքական գործիչ, Ազգային ինքնորոշում միավորում կուսակցության առաջնորդ Պարույր Հայրիկյանը զրկել է բնակիչներին արևի լույսից:
Վրդովված կինն ասաց, որ Պարույր Հայրիկյանը շինարարությունը կատարել է առանց քաղաքապետարանի թույլտվության, քանի որ չի իմացել, որ նախապես պետք է դիմեր քաղաքապետարան և ստանար թույլտվություն: Նրա խոսքով` ինքը արդեն զանգահարել է Երևանի քաղաքապետարան, թեծ գիծ, դիմել է ապօրինի շինարարությունների բաժին, համատիրություն, որտեղ նրան պատասխանել են՝ ուզեք, թե չուզեք, նա կստանա այդ իրավունքը:
«Եթե նա Պարույր Հայրիկյանն է, ուրեմն կարո՞ղ է զրկել ինձ արևի լույսից: Ուզում եմ հասկանալ` որտե՞ղ եմ ապրում, ո՞ր երկրում, ի՞նչ պետք է անեմ իմ ոտնահարված իրավունքները վերականգնելու համար»,- ասաց շենքի բնակչուհին: Նրա խոսքով` իրեն այլ բան չի մնում, քան դնել ու քանդել Պարույր Հայրիկյանի շարածը: «Նա ինձ հրահրում է անօրինական գործողությունների»,- ասաց Բ. Սաֆոյանը:
