Կալիֆորնիայի Լոուրենսի անվան Լիվերմորի ազգային լաբորատորիայի գիտնականները, փորձելով ստանալ մաքուր էներգիա, լուրջ առաջընթաց են գրանցել: Ջերմամիջուկային կառավարվող սինթեզի միջոցով հնարավոր է եղել ստանալ ավելի շատ էներգիա, քան պահանջվել է այդ էներգիան ստեղծելու համար: Այս մասին հաղորդում է Financial Times պարբերականին։
Սա շատ կարևոր քայլ է, քանի որ երկրները փորձում են նվազեցնել հանածո վառելիքի օգտագործումը, որը ածխաթթու գազի արտանետումների, հետևաբար նաև՝ կլիմայի փոփոխության հիմնական պատճառներից է: Բացի այդ, Ուկրաինայում ռազմական գործողությունների պատճառով առաջացած էներգետիկ ճգնաժամն ավելի է մեծացրել այլընտրանքային էներգիայի պահանջը: Ըստ հրատարակության տվյալների՝ հետազոտողները վերարտադրել են այն նույն գործընթացը, ինչ տեղի է ունենում Արեգակի վրա:
Նրանք ջրածնի պլազմայի վրա ներգործել են 192 լազերներով: Արդյունքում հետազոտողներն ստացել են մոտ 2,5 մեգաջոուլ էներգիա: Ջերմամիջուկային կառավարվող սինթեզի արդյունքում ստեղծված էներգիան այնքան հզոր է եղել, որ սարքավորումներից մի քանիսը վնասվել են։ Լաբորատորիան դեռ վերլուծում է արդյունքները, սակայն ԱՄՆ էներգետիկայի նախարարությունն արդեն հայտարարել է, որ պատրաստվում է դեկտեմբերի 13-ին հայտնել բեկումնային արդյունքների մասին։ Նման ռեակցիաների ուսումնասիրությունն իրականացվել Է դեռևս 1950-ական թվականներից, սակայն մինչ այժմ գիտնականներին չէր հաջողվել ստեղծել ավելի շատ էներգիա, քան ծախսվում էր ռեակցիայի ընթացքում: Նախորդ տարի հենց նույն լաբորատորիայում հաջողվել Էր ստանալ ծախսված էներգիայի մոտ 70 տոկոսը։
