Ֆրանսիայի ազգային հավաքականը կրկին աշխարհի առաջնության եզրափակչում է։ Կիսաեզրափակչում աշխարհի գործող չեմպիոնը 2։0 հաշվով առավելության հասավ Մարոկկոյի նկատմամբ։ Հիշեցնենք, որ 2018 թվականին Ռուսաստանում տեղի ունեցած Մունդիալում ֆրանսիացիները եզրափակչում 5։2 հաշվով հաղթել էին Խորվաթիային։ Ունենալով կադրային լուրջ խնդիրներ Դիդիե Դեշամի թիմը ընթացիկ առաջնությունում ցուցադրեց որակյալ ֆուտբոլ։ Երեկվա մրցավեճում Ֆրանսիան առաջին հերթին հաղթեց տակտիկական պայքարում։ Հանդիպման սկզբից մեծ ճնչում գործադրելով ֆրանսիացիները կոտրեցին Մարոկկոյի ամուր դիմադրությունը։ Այնուհետև, զիջելով դաշտի կենտրոնը Ֆրանսիան ապավինեց հակագրոհներին և հասավ իր նպատակին։
«Այո ցանկալի արդյունքի հասնելը հպարտանալու առիթ է տալիս: Մենք կատարեցինք վերջին քայլը դեկտեմբերի 18-ին կայանալիք եզրափակչից առաջ։ Հեշտ չէր, բայց որակի, փորձի, ճիշտ մտահղացումների համադրման շնորհիվ հասանք մեր նպատակին։ Որպես մարզիչ՝ ինձ գոհացնում են այն խաղացողները որոնք իմ տրամադրության տակ են։ Մեսին փայլեց մրցաշարի հենց սկզբից։ Չորս տարի առաջ ես արդեն պատկերացնում էի նրա դերը խաղադաշտում, և նա վերածվեց կենտրոնական հարձակվողի… Նա շատ է խաղում գնդակով, նա իսկապես շատ ուժեղ է: Մենք կփորձենք հնարավորինս սահմանափակել նրա ազդեցությունը, ինչպես նրանք կփորձեն նույնը անել մեր որոշ խաղացողների հետ»,- Մարոկկոյի դեմ խաղից հետո ասել է Դեշամը։ Ի դեպ, երեկվա հանդիպմանը մարզադաշտից հետևել է Ֆրանսիայի նախագահ Էմանուել Մակրոնը։ Վերջինս խաղից հետո շնորհավորելով իր երկրի հավաքականին կարևոր դիտարկում է արել։ «Մեր հայրենակիցներին անհրաժեշտ է այս պարզ մաքուր ուրախություն, որը պարգևում է սպորտը, մասնավորապես, ֆուտբոլը։ Որոշ դրվագներում թիմի համար դժվար էր, բայց մենք տեսանք ուժեղ ազգային թիմ։ Շնորհակալություն մեր մարզիչին և այս թիմին, որը մի քանի սերունդների համադրություն է։ Դա հրաշալի է։ Դեշամը հաղթել է երեք եզրափակիչում։ Նա պետք է մնա հավաքականում։ Շատ եմ հպարտանում այս թիմով»,- խաղից հետո ասել է Մակրոնը։ Վերջինս գնացել է հանդերձարամ և անձամբ շնորհավորել ֆուտբոլիստներին և գլխավոր մարզչին։ Դեռևս աշխարհի առաջնության մեկնարկից առաջ տեղեկություն էր տարածվել, որ անկախ Մունդիալի արդյունքից Դեշամը հեռանալու է Ֆրանսիայի հավաքականից։
Ավելին, խոսվում էր, որ նրա փոխարեն գլխավոր մարզիչ է նշանակվելու Զինեդին Զիդանը։ Վերջին հայտարարությամբ Մարկոնն ըստ էության արտահայտեց իր կարծիքն ու որոշումը Դեշամի վերաբերյալ։ Այս մասնագետի ազգային թիմում մնալը կարծում ենք միանգամայն ճիշտ ու արդարացի կլինի։ Արդեն այսօր ֆրանսիական մամուլում տեղեկություն է տարածվել, որ Ֆրանսիայի ֆուտբոլի ֆեդերացիան մտադիր է ևս երկու տարով երկարաձգել պայմանագիրը Դեշամի հետ։ Ինչևէ, առաջիկա կիրակի Ֆրանսիայի հավաքականը կփորձի պահպանել աշխարհի չեմպիոնի տիտղոսը մրցելով Արգենտիանյի հետ։ Ֆուտբոլային աշխարհը անհամբեր սպասում է ՊՍԺ-ում ելույթ ունեցող Լիոնել Մեսիի և Կիլիան Մբապեի դիմակայությանը։ «Մեսսին մեզ չի վախեցնում։ Արգենտինայի հավաքականը շատ ուժեղ թիմ է։ Մենք գիտենք, որ հանդիպումը հիանալի է լինելու: Մենք մի քանի օր ունենք նախապատրաստվելու համար»,- նշել է երեկ Ֆրանսիայի հավաքականի կազմում գոլի հեղինակ դարձած Տեո Էրնանդեսը։
Եզրափակչին ընդառաջ սկանդալային հայտարարություն է արել հայտնի մարզական լրագրող Պիրս Մորգանը։ Վերջինս հույս հայտնելով, որ Ֆրանսիան կհաղթի եզրափակչում TALKSPORT-ին տված հարցազրույցում ասել է․ «Ես կարծում եմ, որ Ֆրանսիան, այնուամենայնիվ, կհաղթի աշխարհի առաջնությունը և կկոտրի Մեսսիի սիրտը»։ Հիշեցնենք, որ կիսաեզրափակչում 3։0 հաշվով հաղթելով Խորվաթիային Արգենտինայի հավաքականն առաջին էր տիրացել եզրափակչի ուղեգրին։