Հունգարիայում ուժի մեջ է մտել մի օրենք, համաձայն որի՝ այդ երկրում այսուհետ լրացուցիչ հարկ է գանձվելու աղի և քաղցր սննդի համար: Այսպես կոչված «չիփսերի հարկի» շնորհիվ հունգարական կառավարությունը մտադիր է ամեն տարի հունգարական բյուջե ներգրավել լրացուցիչ 74 միլիոն եվրո: Այս մասին հաղորդում է France Presse գործակալությունը:
Կառավարությունում այս քայլը բացատրել են երկրի ազգաբնակչության առողջության պաշտպանության և ավելորդ քաշի դեմ պայքարի անհրաժեշտությամբ: Կառավարությունում ակնկալում են, որ հունգարացիները հարկերի բարձրացման արդյունքում կսկսեն ավելի քիչ քաղցր գազավորված խմիչքներ, չիփսեր և շոկոլադ գնել, իսկ արտադրողները` ավելի քիչ աղ և շաքար օգտագործել:
Օրենքի համաձայն` այս հարկատեսակը չի գանձվելու հունգարական ավանդական խոհանոցի այնպիսի սննդամթերքներից, ինչպիսիք են սալյամին և նրբերշիկը: Սակայն տեղի արտադրողներն այս հարկատեսակի սահմանումն անարդարացի են համարում, իսկ էներգետիկ ըմպելիքներ արտադրող Hell ընկերությունը պատրաստվում է այդ օրենքը բողոքարկել դատարանում:
