Ռուսական Regnum լրատվական գործակալության փոխանցմամբ՝ ԼՂՀ անկախության 20-ամյակի նախօրեին՝ սեպտեմբերի 1-ին, Աբխազիայի նորընտիր նախագահ Ալեքսանդր Անկվաբը շնորհավորական նամակ է ուղարկել ԼՂՀ նախագահ Բակո Սահակյանին։
Դրանում մասնավորապես նշված է. «Հուսով եմ, որ փաստացիորեն անկախ ԼՂՀ-ն շուտով կստանա նաև միջազգային իրավական ճանաչում։ Աբխազիայի և Լեռնային Ղարաբաղի ժողովուրդները, հաղթահարելով ծանր խոչընդոտներ, հասել են գլխավոր նպատակին՝ իրենց երկրների անկախությանը։ Մենք պետք է պահպանենք այդ անկախությունը, հանուն ապագա սերունդների՝ վերակենդանացնենք ազգային պետականությունը»։
Հիշեցնենք, որ օգոստոսի 26-ին Աբխազիայի նախագահ ընտրվելու կապակցությամբ Բակո Սահակյանն իր հերթին օգոստոսի 29-ին շնորհավորական ուղերձ էր հղել Ալեքսանդր Անկվաբին:
Ի դեպ, ընտրվելուց հետո Անկվաբը հայտարարել է, որ Աբխազիան պատրաստ է բացել դեպի Հայաստան երկաթուղային տարանցումը, սակայն դա կախված չէ միայն Աբխազիայից։
Իսկ Աբխազիայի նախագահական ընտրություններից օրեր առաջ Աբխազիայի նախագահական թեկնածուներից Ռաուլ Խաջիմբան հայտարարել էր, որ աբխազները պետք է օրինակ վերցնեն Ղարաբաղից.
«Շատ ոլորտներում Լեռնային Ղարաբաղը և նրա քաղաքացիները մեզ համար փայլուն օրինակ են ծառայում։ Մի քանի տարի առաջ ես եղել եմ Ղարաբաղում։ Այն, ինչ ես տեսա այնտեղ, հաճելիորեն զարմացրեց ինձ։ Աբխազիան կարող է կյանքի տարբեր ոլորտներում ընդօրինակել ղարաբաղցիների փորձը։
Սակայն ինձ թվում է, թե ամենագլխավորն այն է, որ ղարաբաղցիներին հաջողվել է ավարտին հասցնել բանակաշինության գործընթացը։ Նրանց մոտ դա բավական լավ է ստացվում, քան մեզ մոտ։ Բանակաշինության ոլորտում Լեռնային Ղարաբաղի հաջողությունը պայմանավորված է նրանով, որ նրա բնակիչներն ամուր ցանկություն ունեն՝ կառուցելու իրենց անկախ պետությունը։
Ղարաբաղցիներին հաջողվել է համեմատաբար կարճ ժամանակահատվածում վերացնել պատերազմի հետքերը։ Ռազմական գործողությունների արդյունքում լիովին ավերված Արցախի մայրաքաղաք Ստեփանակերտն ամբողջությամբ վերականգնված է։ Մյուս հանգամանքը, որ ինձ դուր եկավ, պատերազմի վետերանների նկատմամբ ցուցաբերած վերաբերմունքն է։ Նրանց հանդեպ անսահման հարգանք են տածում։ Մեզ անհրաժեշտ է օրինակ վերցնել ղարաբաղցիներից»։
