«Հայաստանի և Արցախի ամենաուժեղ կարգավիճակը 1994թ. մայիս ամսին էր, երբ կնքվեց զինադադարի պայմանագիրը, հետո սկսվեց զարգացման փուլ թե՛ Հայաստանում, թե՛ Արցախում, և Արցախի ժողովուրդն իսկապես զգաց անկախության համը, և Արցախը մտավ իրական անկախացման և ազատ ապրելու իրավունքի մեջ»,- «Առաջին լրատվականի» հետ զրույցում Արցախի 20-ամյա անկախության տարիները գնահատելով՝ նշեց Հայաստանի Լիբերալ կուսակցության նախագահ Հովհաննես Հովհաննիսյանը:
Նա նկատեց, որ 1998թ. հետո, երբ հեղաշրջման արդյունքում Հայաստանի նախագահ դարձավ Ռոբերտ Քոչարյանը և պայման դրվեց, որ նա պետք է ներկայացնի նաև Լեռնային Ղարաբաղը, ԼՂ հարցի կարգավորման մի նոր և բացասական փուլ սկսվեց. «Այն պահից, երբ Ռոբերտ Քոչարյանը, լինելով չընտրված նախագահ, ներկայացրեց նաև Ղարաբաղը բանակցային գործընթացում, Ղարաբաղը կորցրեց իր անկախությունը, կորցրեց իրական անկախություն ձեռք բերելու հնարավորությունը, և մինչև հիմա, ցավոք սրտի, այդ վիճակը շարունակվում է»:
Հովհաննես Հովհաննիսյանը, շնորհավորելով հայ ժողովրդին Արցախի 20-ամյակի կապակցությամբ, ցավով նշեց, որ լավ գնահատականներ չի կարող տալ 20-ամյա Արցախի մասին. «Կուզեի լավ բաներ ասել, բայց տեսնում ենք, թե ինչպես է Ղարաբաղը հայաթափվում, Ղարաբաղում գործում է նույն արատավոր կառավարման համակարգը, ինչը կա Հայաստանում, Ղարաբաղի «էլիտան», որը պետք է մնար Ղարաբաղում և ապահովեր նրա զարգացումը, եկավ Հայաստան և վերածվեց օլիգարխների, և Ղարաբաղը մնաց Հայաստանի և աշխարհի օգնության կարոտ մի երկիր, որը փորձում է 20 տարի հետո վախվորած քայլեր անել բանակցային գործընթացում մասնակցելու ուղղությամբ»:
