Ադրբեջանի պաշտպանության նախարարությունը հաղորդում է, որ մեկնարկել են ադրբեջանա-թուրքական հերթական համատեղ զորավարժություններն Իրանի սահմանին՝ «Բաքվի, Աստարայի, Ջաբրայիլի (Ջրական) և Իմիշլիի շրջաններում։
Ըստ Պաշտոնական հաղորդագրության՝ զորավարժություններն ընթանում են մարտական և հատուկ ինժեներասակրավորային տեխնիկայի, ինչպես նաև Ադրբեջանի բանակի և Թուրքիայի զինված ուժերի ռազմական ավիացիայի ներգրավմամբ։
Նույն աղբյուրի համաձայն՝ թուրք ու ադրբեջանցի զինծառայողները համատեղ իրականացնում են մարտական պատրաստության տարբեր առաջադրանքներ։
Ռազմական գերատեսչությունը վարժանքներում ներգրավված զորքի թվաքանակի և կիրառվող զինտեխնիկայի մասին մանրամասներ չի հայտնում։
Իրանահայ քաղաքական մեկնաբան Մովսես Քեշիշյանն «Առաջին լրատվական»-ի հետ զրույցում ասաց, որ Իրանի իշխանություններն առայժմ պաշտոնապես սրան չեն անդրադարձել․ «Բայց հայտնի է, որ Ադրբեջանը Իրանի վերջին ակտիվությունը Իրան-Ադրբեջան սահմանի մոտ, մանավանդ տեղի ունեցած զորավարժությունները, շատ կոպիտ ձևով արձագանքեց, նույնիսկ նախագահի մակարդակով հայտարարություններ հնչեցին։ Իրանական կողմը մշտապես նշել է, որ չի ցանկանում որևէ կողմի հետ կռվի մեջ մտնել, բայց միևնույն ժամանակ թույլ չի տա, որ իր շահերը տարածաշրջանում վտանգվեն»։
Քեշիշյանի խոսքերով՝ Իրան-Հայաստան ընդհանուր սահմանը, Թեհրանի համար կարմիր գիծ է․ «Այն ինչպես գոյություն է ունեցել, այդպես էլ պետք է մնա։ Ադրբեջանական կողմն էլ հայտարարեց, որ որևէ կողմի հայտարարությունները կամ քայլերը իրեն չեն վախեցնում։ Ադրբեջանը մտածում է, որ հենվելով Իսրայելի կամ Թուրքիայի պաշտպանությանը, կարող է նաև այլ ուղղություններով ակտիվություն ցուցաբերել, նաև Իրանին ճնշել։ Մանավանդ Իրանում տեղի ունեցող քաղաքական դժգոհությունները փորձում են օգտագործել՝ իրենց նպատակներին հասնել։Կարծում են, որ Իրանը խառը լինելով իր ներքին հարցերով չի կարողանա համապատասխան քայլերի դիմել կամ հակազդեցության գնալ։ Սրանք դատարկ ենթադրություններ են։ Իրանը չի պատրաստվում որևէ մեկին զիջել իր իրավունքները և ամեն ինչ կանի դրանք պաշտպանելու համար»։
Մեր զրուցակիցը նշում է, որ Ադրբեջանին աջակցող հայտարարություններն Իսրայելի կողմից չեն կարող Իրանին հետ պահել իր իրավունքները պաշտպանելուց․ «Միևնույն ժամանակ ես չեմ գտնում, որ Ադրբեջանը կգնա լուրջ ոտնձգությունների։ Թեպետ որոշները նման մտքեր արտահայտում են, ես չեմ կարծում։ Ադրբեջանը, վերջին հաշվով, փորձում է դրանով ցույց տալ, որ ինքը չի վախենում, բայց դա ինքնին վախի նշան է։Եթե չես վախենում, ինչու՞ ես նման քայլերի գնում։ Սա ուղղակիորեն ցույց է տալիս, որ նա այլ նպատակներ ունի։ Բայց ես չեմ կարծում, որ կարող են պատերազմի գնալ, լավ հասկանում են, որ տարածաշրջանում նման պատերազմի հավանականությունը կործանարար ազդեցություն կունենա։ Դա որևէ մեկի շահերից չի բխում»։
