Ադրբեջանն ու Թուրքիան իրականացնում են համատեղ զորավարժություն, որը կանցնի Իրանի հետ սահմանամերձ շրջաններում, այդ թվում նաև 44-օրյա պատերազմի հետևանքով Բաքվի վերահսկողության տակ անցած տարածքներում: Զորավարժությունը ենթադրելու է նաև գետանցման վարժանքներ, հակառակորդի թիկունքում դեսանտի իջեցման գործողություններ և այլն: Թուրք-ադրբեջանական զորավարժության քաղաքական նշանակության մասին է խոսում այն, որ Բաքու են ժամանել Թուրքիայի պաշտպանության նախարարն ու գլխավոր շտաբի պետը: Օրեր առաջ Ադրբեջանի նախագահ Ալիևը անդրադառնալով Իրանի սահմանային զորավարժություններին նշել էր, թե իրենք չեն վախենում ոչ մեկից և իրենք էլ զորավարժություն են անում դա ցույց տալու համար: Ինչպես իրանական զորավարժություններն էին պարունակել գետանցման տարր, այդպես էլ թուրք-ադրբեջանականն է պարունակում գետանցում:
Ակնառու է, որ այդ բաղադրիչը հատկապես ընդգծում է այսպես ասած սլաքի քաղաքական կամ աշխարհաքաղաքական ուղղությունը: Գետը, այսինքն ադրբեջանա-իրանյան սահմանը՝ կարմիր գիծն է, համենայն դեպս դատելով Թեհրանի պարբերաբար կրկնվող հայտարարություններից, ու գետանցման պլանը, որ փորձարկվում է զորավարժության սցենարով, փաստացի իրանական կարմիր գիծը հատելու սցենարն է: Դա տեղի է ունենում Իրանում ներքին ընդվզման շարունակվող ֆոնին, որը տևում է արդեն ամիսներ և ակնառու է, որ իրանական վարչակազմը չի կարող «ավանդական» մեխանիզմներով զսպել հասարակական այս ընդվզումը: Սա չի նշանակում, որ Իրանում աներկբա է նոր հեղափոխության հեռանկարը: Խնդիրը սակայն այն է, որ Իրանի ներսում իշխանության մարտահրավերները բարդացնելու միջոց կարող է դիտվել Իրանին արտաքին մարտահրավերների առաջ կանգնեցնելը: Այսպես ասած «կիսելով» իրանական վարչակազմի ուշադրությունը վառվող ներսի ու դրսի միջև, անկասկած է թերևս, որ էլ ավելի կբարդացնեն ներքին ռիսկերին ու զարգացումներին արձագանքելու կարողությունը և հնարավորությունը:
Առայժմ իհարկե կատարվում է քաղաքական փորձ՝ զորավարժություններ, որոնք անշուշտ լարելու են Իրանին: Թեհրանի արտգործնախարարը մեղադրանք է հնչեցրել Արևմուտքի, մասնավորապես ԱՄՆ հասցեին, թե Նահանգները փորձում է ճնշել Իրանին, որպեսզի բերի իր, այսինքն Նահանգների պայմաններով միջուկային գործարքի շուրջ համաձայնության: Ի՞նչ կլինի, եթե Իրանը շարունակի դիմադրել: