Թուրքական Hurriyet օրաթերթը մի հոդված է հրապարակել, որում ներկայացված է իրավիճակը, որ ստեղծվել է Հայկական պատրիարքությունում ֆինանսական խորհրդում տեղի ունեցած մասսայական հրաժարականներից հետո, որոնք պայմանավորված են գործող պատրիարքի հետ ունեցած տարաձայնություններով:
«Այսպիսի բան չի եղել պատրիարքության ողջ պատմության ընթացքում»,- Hurriyet-ին տված հարցազրույցում հայտարարել է համայնքի առանցաքային դեմքերից մեկը և ֆինանսական խորհրդի ամենակարևոր անձը` Մելքոն Կարագյոզը: «Մենք (Թուրքիայի հայերը) մեր ամբողջականության և միասնության կորստի առաջ ենք կանգնած և այսօր մենք ապրում ենք ծայրահեղ մութ ժամանակներում»:
Արքեպիսկոպոս Արամ Աթեշյանի հետ ունեցած խնդիրներից հետո Խորհուրդը որոշել է հրաժարական տալ: Թերթը հիշեցնում է, որ Աթեշյանին գործող պատրիարք է նշանակել ներքին գործերի նախարարն այն բանից հետո, երբ համայնքը չի կարողացել ներկայիս Մեսրոպ 2-րդ պատրիարքի հիվանդությունից հետո նրան փոխանորդ ընտրել:
Ֆինանսական խորհուրդն անհրաժեշտ էր համայնքի տնտեսական հարցերը լուծելու համար, սակայն այժմ ամբողջ իշխանությունը գործող պատրիարքի ձեռքում է:
«Ֆինանսական խորհուրդը վատ իրավիճակում է հայտնվել արքեպիսկոպոս Աթեշյանի հետ հարաբերություններում և որոշում է կայացրել հրաժարական տալ»,- ասել է Կարագյոզը:
«Աթեշյանն ազնիվ մարդ է, բայց նա այսօր պետք է քայլեր ձեռնարկի, որպեսզի նրա հետ վաղը հաշվի նստեն, ապա թե ոչ՝ ապագայում կտառապի դրանից»,- ասել է Կարագյոզը` ավելացնելով, որ համայնքին պետք է հնարավորություն տրվի նոր պատրիարք ընտրելու։ Դա ավելի լավ կլինի, քան փոխարինողի համակարգը կիրառել փորձելը:
Հայկական համայնքի կոմերցիոն գործերով զբաղվող Ֆինանսական խորհրդի հրաժարականը լուրջ խնդիրներ է առաջացրել համայնքում, քանի որ որոշումներ ընդունելիս անհրաժեշտ է, որպեսզի փաստաթղթի տակ լինի մեկ հոգևորականի և մեկ աշխարհիկ ներկայացուցչի ստորագրություն: Միայն այս դեպքում փաստաթուղթն օրինական կհամարվի: Այս ավանդույթը գալիս է դեռ օսմանյան ժամանակաշրջանից:
«Երբ ես չստորագրեցի փաստաթուղթը, պատրիարքության ֆինանսական բոլոր գործերը դադարեցվեցին»,- ասել է Կարագյոզը` հայտնելով, որ նա միակ աշխարհիկ անձն էր, որը պատասխանատու էր փաստաթղթերի տակ դրվող ստորագրությունների համար: «Ես համայնքի անունից ստորագրում էի փաստաթղթերը, և աշխարհիկ անձի ստորագրության առկայությունը հոգևորականի ստորագրության կողքին պարտադիր էր այն բանի համար, որպեսզի հնարավոր լիներ խուսափել կաշառակերութոյւնից»:
Կարագյոզը ծառայել է հայկական համայնքում վերջին 30 տարիների ընթացքում և եղել է վերջին 3 պատրիարքների աջ ձեռքը: