Բերդ համայնքի ղեկավարի տեղակալ Սամվել Հովսեփյանը և Ներքին Կարմիրաղբյուր բնակավայրի վարչական ղեկավար Լևոն Առաքելյանը գրավի դիմաց ազատ են արձակվել։ Տավուշի մարզի ընդհանուր իրավասության դատարանը՝ դատավոր Արամ Մարտիրոսյանի նախագահությամբ, դեռեւս նոյեմբերի 23-ին է որոշում կայացրել նրանց նկատմամբ ընտրված խափանման միջոց կալանավորումը գրավով փոխարինելու մասին։ Պաշտպան Գոռ Սաղոյանը «Փաստինֆո»-ի հետ զրույցում հայտնեց, որ գրավի չափ է սահմանվել 1 մլն ՀՀ դրամը։
Ավելի վաղ դատարանը գրավ էր կիրառել նաեւ Բերդի համայնքապետարանի աշխատակազմի քարտուղար Հասմիկ Մելիքյանի նկատմամբ՝ գրավի չափ սահմանելով 800.000 ՀՀ դրամը։
Հիշեցնենք, որ Սամվել Հովսեփյանը մեղադրվում է պաշտոնեական դիրքն օգտագործելով՝ Բերդ համայնքում խմբի կողմից ՏԻՄ ընտրություններին քարոզչություն կատարելուն հարկադրելու մեջ։ Քրեական վարույթի շրջանակներում մեղադրանքներ են ներկայացվել Տավուշի մարզի Բերդի համայնքապետարանի աշխատակազմի քարտուղարին և նույն համայնքի Ներքին Կարմիրաղբյուր բնակավայրի վարչական ղեկավարին՝ ՀՀ քրեական օրենսգրքի 211-րդ հոդվածի 2-րդ մասի 3-րդ և 5-րդ կետերով: Ընդ որում, քրեական հետապնդումն իրականացվում է սեպտեմբերի 25-ի Բերդ համայնքում կայացած ՏԻՄ ընտրությունների արդյունքներից հետո, երբ պարզվել է, որ իշխող ուժը՝ ՔՊ կուսակցությունը Բերդ համայնքում կրկին պարտվել է և, փաստացի, Բերդ համայնքի ղեկավար Հարություն Մանուչարյանը, որն արդեն տևական ժամանակ է կալանավորված է, անազատության մեջ գտնվելով՝ կրկին հաղթել է ընտրություններում և իրավապահներն այս անգամ թիրախավորել են նրա տեղակալ Սամվել Հովսեփյանին։
Սեպտեմբերի 30-ին Տավուշի մարզի ընդհանուր իրավասության դատարանը բավարարել է Սամվել Հովսեփյանին կալանավորելու մասին քննիչի միջնորդությունը։ Ինչ վերաբերում է Լևոն Առաքելյանին և Հասմիկ Մելիքյանին, ապա ՔԿ տարածած հաղորդագրության համաձայն՝ Հասմիկ Մելիքյանը եւ Լևոն Առաքելյանը 2022 թվականի սեպտեմբերի 25-ին Բերդ համայնքում կայանալիք ՏԻՄ ընտրություններին սատարելով «Զորավոր համայնք» դաշինքին, օգտագործելով իրենց տրված իշխանական լիազորությունները, Բերդ համայնքի ղեկավարի և «Ներքին Կարմիրաղբյուրի մանկապարտեզ» ՀՈԱԿ-ի տնօրենի ժամանակավոր պաշտոնակատարի միջեւ կնքված աշխատանքային պայմանագիրը լուծելու եւ պայմանագրի ժամկետը դադարեցնելու սպառնալիքով, 2022 թվականի օգոստոսին վերջինիս հարկադրել են ընդգրկվել հիշյալ դաշինքում և նույն դաշինքի օգտին կատարել քարոզչություն՝ այդ կերպ հարկադրելով նրան հրաժարվել իր նախընտրած կուսակցության օգտին նախընտրկան քարոզչություն կատարելուց:
Նրանց նկատմամբ հարուցվել էր հանրային քրեական հետապնդում՝ ՀՀ ՔՕ 211-րդ հոդվածի 2-րդ մասի 3-րդ եւ 5-րդ կետերով, իսկ նույն համայնքի Ներքին Կարմրաշուրթ բնակավայրի վարչական ղեկավարի նկատմամաբ՝ ՀՀ քրեական օրենսգրքի 46-211-րդ հոդվածի 2-րդ մասի 3-րդ եւ 5-րդ կետերով:
