Ֆրանսիայի նախագահ Նիկոլա Սարկոզին սուր քննադատության է ենթարկել Իրանի իշխանությունների վարած քաղաքականությունը` ոգևորված Լիբիայում ՆԱՏՕ-ի զորքերի հաջողություններով: Սարկոզին ֆրանսիացի դիվանագետների հետ հանդիպման ժամանակ ասել է, որ Իրանը, զարգացնելով իր ատոմային և բալիստիկ հզորությունները, դրդում է ստանալ կանխարգելիչ հարված: Այս մասին հաղորդում է Le Parisien-ը:
«Իրանի աճող ռազմական, միջուկային և բալիստիկ հզորությունները կարող են կանխարգելիչ հարված հասցնելու պատճառ դառնալ, որը կարող է վերածվել լուրջ ճգնաժամի, որից Ֆրանսիան կփորձի խուսափել բոլոր հնարավոր միջոցներով»,- ասել է Սարկոզին` չճշտելով, թե հատկապես որ երկիրը կարող է նման հարված հասցնել: Նա ողջ մեղքը դրել է Իրանի իշխանությունների վրա` ասելով, որ այդ երկիրը հրաժարվում է լուրջ բանակցություններից, անընդհատ սադրանքներ է հրահրում, ձեռնոց նետում միջազգային հանրությանը` համոզված լինելով, որ համարժեք պատասխան չի ստանալու:
