Ինչպես այսօր գրում է The Wall Street Journal-ը, մի շարք օտարերկրյա ընկերություններ, որոնք մասնակցել են Լիբիայի տեղեկատվական տեխնոլոգիաների ոլորտի զարգացմանը, օգնել են Մուամար Քադաֆիի ռեժիմին՝ հետևելու համացանցում ընդդիմության գործունեությանը:
Այդ ընկերություններն են ֆրանսիական Amesys-ը, ամերիկյան Narus-ը, չինական ZTE-ը և հարավաֆրիկյան VASTech-ը: Ըստ պարբերականի տեղեկությունների՝ մայրաքաղաք Տրիպոլիում տեղակայված է եղել տեղեկատվական կենտրոն, որտեղ վերոնշյալ ընկերությունների կողմից մշակված որոշակի ծրագրերի գործարկման շնորհիվ վերլուծվում էր համացանցից հավաքված տեղեկությունը` էլ. փոստ, չաթեր, կարճ հաղորդագրություններ: Նշվում է նաև, որ Amesys ընկերությունը Քադաֆիին է վաճառել տեղեկությունների հավաքման, զտման և մշակման սեփական համակարգը: Ապստամբության օրերին այդ համագործակցությունն ավելի է սերտացել:
Տեղեկացնենք նաև, որ Amesys-ը համարվում է Bull ընկերության ներկայացուցիչն արաբական այդ երկրում: Bull-ի ներկայացուցիչները հրաժարվում են որևէ մեկնաբանություն ներկայացնել այս հրապարակման վերաբերյալ:
