Իսրայելի պաշտպանության բանակը (Ցախալ) Հորդանան գետի Արևմտյան ափին բնակվողներին սկսել է նախապատրաստել պաղեստինյան բնակչության հնարավոր ցույցերին: Անկարգություններ ակնկալվում են ՄԱԿ-ի Գլխավոր ասամբլեայում Պաղեստինին անկախության տրամադրման արագացված քվեարկության առնչությամբ: Ինչպես հայտնում է Haaretz օրաթերթը, «Ամառային սերմեր» օպերացիայի շրջանակներում տեղի բնակիչներին կբաժանվեն արցունքաբեր գազով լի գլանակներ և պայթաձայնային նռնակներ:
Իսրայելական թերթի տրամադրության տակ հայտնված փաստաթղթերի համաձայն՝ ՄԱԿ-ի կողմից պաղեստինյան պետության անկախության ճանաչման դեպքում Իսրայելի գրաված տարածքներում արաբական բնակչության մեջ կարող են սկսվել զանգվածային ցույցեր և անկարգություններ: Haaretz-ի տվյալներով՝ Ցախալում չեն բացառում նաև բռնությունների կիրառումը՝ ցուցարարների միջից իսրայելցիների վրա կրակի բացումն ու ահաբեկչություններ:
Կանխատեսումներ կան նաև երրորդ ինտիֆադայի սկզբի մասին:
Կանխատեսվում է, որ պաղեստինցիների ակցիաները կարող են անցկացվել հրեաներով բնակեցված տարածքներում: Բացի այդ, կանխատեսվում է, որ ցուցարարները կարող են հարձակումներ գործել Իսրայելի տարբեր պետական հաստատությունների վրա, որոնք սեպտեմբերի 19-ից կսկսեն աշխատել խստացված ռեժիմով:
Անձամբ զինվորականները ստացել են հստակ ցուցումներ նման իրավիճակում գործելու համար: Այսպես՝ Արևմտյան ափի ցանկացած բնակավայրի սահմանին անց է կացվել պայմանական «կարմիր գիծ», որն անցնելու դեպքում ցուցարարներն արդեն գործ կունենան զինվորականների հետ: Սակայն, ըստ ՑԱԽԱԼ-ի հրամանատարության ցուցումների, զինվորականները պետք է կրակեն միմիայն ցուցարարների ոտքերին՝ հնարավոր զոհերից խուսափելու համար:
Ավելի վաղ The Jerusalem Post թերթը հայտնել էր, որ ծրագրի շրջանակներում, որը նախատեսում էր ցույցերի ժամանակ մասնակիցներին ցրելիս զոհերի նվազեցում, Իսրայելի պաշտպանության բանակի դիպուկահարներին կտրամադրվի նոր տեխնիկա, որը թույլ կտա ավելի դիպուկ լինել կրակելիս: Այսպես՝ զինվորականները կստանան նոր լազերային նշանադիրներ, որոնք թույլ են տալիս աշխատել վատ տեսողության պայմաններում մեկ կիլոմետր հեռավորության վրա և նշանառու կրակ արձակել լազերային մարկերով նշված օբյեկտների վրա:
Պաղեստինի անկախության մասին բանաձևը, ինչպես ակնկալվում է, կներկայացվի ՄԱԿ-ի Գլխավոր ասամբլեայի սեպտեմբերի 20-ին նախատեսված բացման նիստին: Պաղեստինցիների կողմից նման քայլին դեմ են հանդես եկել ԱՄՆ-ն և Իսրայելը: