News Georgia-ի փոխանցմամբ՝ ԱՄՆ պետդեպարտամենտն օրինական չի համարում Աբխազիայում տեղի ունեցած նախագահական ընտրությունները և հերթական անգամ հայտարարում է Վրաստանի տարածքային ամբողջականությանն ու ինքնիշխանությանն իր աջակցության մասին։
Այս մասին հայտարարել է ԱՄՆ պետդեպարտամենտի պաշտոնական ներկայացուցիչ Վիկտորիա Նուլանդը. «ԱՄՆ-ը չի ճանաչում օգոստոսի 26-ին վրացական Աբխազիա տարածաշրջանում տեղի ունեցած այսպես կոչված՝ ընտրությունների արդյունքները։ Մենք հաստատում ենք միջազգայնորեն ճանաչված սահմաններում Վրաստանի տարածքային ամբողջականությանն ու ինքնիշխանությանը մեր աջակցությունը։
Մենք նաև կոչ ենք անում Ռուսաստանին իրագործել 2008 թվականի ռուս-վրացական պատերազմից հետո կնքված հրադադարի համաձայնագրի պայմանները՝ ներառյալ նախահակամարտային դիրքերից զորքերի դուրս բերումը և տարածաշրջանին ազատ հումանիտար օգնություն ցուցաբերելու համար պայմաններ ընձեռելը»։
Հիշեցնենք, որ օգոստոսի 26-ին Աբխազիայում տեղի ունեցած արտահերթ նախագահական ընտրություններում հաղթել է Ալեքսանդր Անկվաբը՝ առաջին տուրում հավաքելով քվեների 54.9 տոկոսը։
Ի դեպ, հուլիսի վերջին ԱՄՆ Սենատն ընդունեց Վրաստանին առնչվող 5 էջանոց մի բանաձև, որում ամերիկյան օրենսդիրները ոչ միայն ընդգծում էին Վրաստանի սահմանների ու տարածքային ամբողջականության անխախտությանն իրենց աջակցության մասին, այլև Ռուսաստանից պահանջում էին ստանձնած պարտավորությունների կատարում և միջնորդական առաքելությունների ու փախստականների վերադարձ, Աբխազիայից ու Հարավային Օսիայից սեփական զորքերի դուրս բերում։