Aliq.ge-ն գրում է, որ 2022 թվականին Վրաստանից Հայաստան է վերաարտահանվել 2034 միավոր թեթև մեքենա՝ 14,6 մլն դոլար ընդհանուր արժողությամբ, մինչդեռ 2021 թվականի առաջին 6 ամիսներին այս ցուցանիշը կազմել է 234 միավոր ավտոմեքենա՝ 1,6 մլն դոլար ընդհանուր արժողությամբ։ Վրաստանի ավտոներմուծողների միության ղեկավար Լաշա Դարբայսելիի խոսքով՝ սպասվում է վերարտահանման աճ, քանի որ Հայաստանի և Ադրբեջանի միջև պատերազմը փաստացի ավարտվել է, համավարակը՝ ևս: Նա նշել է, որ Հայաստանի շուկան ապագայում կարելի է դիտարկել որպես մրցակից, և եթե Հայաստանը իսկապես մրցակցային շուկա դառնա, ապա Վրաստանին կզրկի տարեկան 800 մլն դոլարից:
«Վարորդի ընկեր» ՀԿ նախագահ Տիգրան Քեյանը «Առաջին լրատվական»-ի հետ զրույցում նշում է, որ այնպես չէ, որ միայն Վրաստանից է աշխուժացել ավտոմեքենաների Հայաստան ներմուծումը, որտեղ որ հասանելի է մեքենաներ ձեռք բերելը, այնտեղից էլ ձեռք են բերում:
«Հիմնակում Վրաստանից բերում են նրանք, որոնք երկար չեն ուզում սպասել, քանի որ այլ երկրներից ավտոմեքենա Հայաստան տեղափոխելու համար ավելի երկար ժամանակ կպահանջվի: Առհասարակ մեքենա ձեռք բերելը շատ գործոններով է պայմանավորված և յուրաքանչյուր քաղաքացի նայում է, թե որտեղից կարելի է ավելի մատչելի ձեռք բերել իր նախընտրած մեքենան: Ընդհանուր առմամբ, երրորդ երկիր ներմուծումը նույն սկզբունքով է կատարվում։ Ըստ էության՝ օրենսդրական փոփոխություն չկա»,-ասաց Քեյանը:
Նա նաև նշում է, որ Ռուսաստան հիմա ավտոմեքենաներ ավելի շատ ուղարկում են, քան գալիս է Ռուսաստանից՝ կապված ռուս-ուկրաինական պատերազմական իրավիճակով պայմանավորված ներմուծման հետ: Քեյանը նաև հիշեցնում է, որ Ռուսաստանում օրենսդրական կարգավորումներ կատարեցին ներմուծվող արտասահմանյան մեքենաների հետ կապված: Ամիսներ առաջ Ռուսաստանի կառավարությունը փոփոխել է արտերկրից քաղաքացիների կամ կազմակերպությունների կողմից ներկրվող ավտոմեքենաների գրանցման գործող կարգը։ Խոսքը մեքենաների տեխնիկական կահավորման պարտադիր պահանջներից մեկի ժամանակավոր չեղարկման մասին է. այժմ դրանք կարելի է օգտագործել առանց ERA-GLONASS արտակարգ ծառայությունների կանչի սարքերի: Նշվում է, որ նման համակարգերով մեքենաների հագեցվածությունը պարտադիր պայման էր մեքենայի ներմուծման և ոստիկանությունում դրա հաշվառման համար։
Քեյանի խոսքով՝ բացի ԵԱՏՄ անդամ երկրների, մյուս բոլոր երկրներից ներմուծումը նույն սակագնով են հաշվարկվում, կլինի ԱՄՆ, թե մեկ այլ երկիր, մաքսային վճարների սակագինը նույնն է: Մաքսային վճարները հաշվարկելով տեսնում են, որտեղ ավելի մատչելի է, այնտեղից էլ բերում են: