Սեպտեմբերի 15-ին ՀՀ վարչական դատարանում տեղի կունենա երկու հասարակական կազմակերպությունների՝ «Թռչնասերների կենտրոն»-ի և «Էկոդար»-ի հայցով «Նեմո» դելֆինարիումի վերաբերյալ գործի քննությունը: Գործի առնչությամբ որպես պատասխանող կողմ ներգրավվել է Բնապահպանության նախարարությունը, որին մեղադրում են անգործության մեջ:
Էկոլոգները նշում են, որ նախարարությունը խախտել է հետևյալ օրենքները՝ «Շրջակա միջավայրի վրա ազդեցության փորձաքննության մասին» ՀՀ օրենքը և Օրհուսի կոնվենցիան՝ ՄԱԿ-Ի ԵՏՀ «Շրջակա միջավայրի հարցերի առնչությամբ տեղեկատվության հասանելիության, որոշումներ ընդունելու գործընթացին հասարակայնության մասնակցության և արդարադատության մատչելիության մասին»։
Հայցում ներկայացված է, որ «Նեմո» դելֆինարիումը կառուցվել է հանրային նշանակության գոտում՝ առանց բնապահպանական փորձաքննություն անցկացնելու, որով էլ խախտվել է համապատասխան օրենքը:
Իր հերթին Բնապահպանության նախարարությունը, որը պատասխանատու է բնապահպանական օրենսդրության կատարման համար, անտեսել է հասարակայնության բազմաթիվ դիմումները տվյալ օբյեկտի անօրինականության վերաբերյալ և ոչ մի միջոցառում չի ձեռնարկել օրենքի վերականգնման համար՝ ասում են էկոլոգները:
«Առաջին լրատվական»-ին «Թռչնասերների կենտրոն» ՀԿ նախագահ Սիլվա Ադամյանը հիշեցրեց, որ դատարանը փետրվարին մերժել էր իրենց հայցը՝ պատճառաբանելով, որ նախարարությանը պետք է հատուկ դիմեին՝ շրջակա միջավայրի գնահատում իրականացնելու համար, ինչը մտնում է գերատեսչության ֆունկցիաների մեջ, և դա կատարելու համար անհրաժեշտ չէ առանձին խնդրանք ստանալ էկոլոգներից:
«Մենք, ինչևէ, դիմեցինք նախարարությանը, սակայն նրանք պատասխանեցին, որ տեղանքը ենթակա չէ փոձաքննություն անցկացնելու»,- ասաց Սիլվա Ադամյանը: Ունենալով նախարարության մերժումը, ՀԿ-ները կրկին դիմեցին դատարան, գործը լսվելու է սեպտեմբերի 15-ից:
Ի դեպ, Բնապահպանության նախարարությունից մեզ հրաժարվեցին մանրամասներ ու մեկնաբանություններ տալ այս հարցի շուրջ: