Թուրքիայում նորից խոսում են Մեծամորի ատոմակայանի վտանգավորության մասին: Թուրքիայի «Իգդիրի լրագրողների համայնք» կառույցի ղեկավար Այդըն Դենիզն անդրադարձել է Մեծամորի ԱԷԿ-ին՝ պնդելով, որ վերջինս իբր «մեծ սպառնալիք է ներկայացնում առաջին հերթին Թուրքիայի ու Ադրբեջանի, ապա նաև Ռուսաստանի, Վրաստանի, Իրանի և Միջին Ասիայի երկրկների համար»:
«Հակառակ այս ամենի՝ ինչո՞ւ է Հայաստանը շարունակում օգտագործել այդ ատոմակայանը: Ոլորտում գործող մի շարք մասնագետների և միջազգային կառույցների կողմից Մեծամորի ԱԷԿ-ը ճանաչվել է աշխարհի ամենավտանգավոր և անվտանգության տարրերից զուրկ ատոմակայանը: Կառուցումից ի վեր այն ենթարկվել է բազմաթիվ վթարների»- ասել է Դենիզը՝ օրինակ բերելով 1988թ.-ի Սպիտակի ավերիչ երկրաշարժը:
Նա նշել է, որ այս հարցում Ադրբեջանը ու Թուրքիան պիտի համատեղ գործեն, որպեսզի «ճնշում գործադրեն Հայաստանի վրա»:
Թուրքագետ Հակոբ Չաքրյանը համարում է, որ որքան էլ ընթանում են հայ-թուրքական բանակցություններ և փորձում են տպավորություն ստեղծել, որ կա դրական ֆոն, Թուրքիայի ներսում շարունակում է իշխել հայատյաց, թշնամական քաղաքականության մղումը․ «Չմոռանանք, որ Թուրքիան ինքն է ատոմակայան կառուցում Միջերկրականի ափին՝ ընդ որում ռուսների հետ։Կարծում եմ, որ հայկական կողմից պետք է կոշտ արձագանքներ հնչեն նմանատիպ թուրքական լկտիություններին։ Եթե մենք չենք արձագանքում, փաստորեն օրինականացնում ենք նրանց լկտիությունները»,-«Առաջին լրատվական»-ի հետ զրույցում ասաց նա։
Ըստ Չաքրյանի՝ եթե Մեծամորի ատոմակայանի առկայությունն անհանգստացնում է թուրքերին և անգամ Թուրքիայի նախագահ Էրդողանին, ապա նա թող դիմի Վլադիմիր Պուտինին․ «Իսկ մեր կողմից հասնում է նման սանձարձակ հայտարարություններին գոնե արձագանքելը։ Տեսեք՝ ռուսները Թուրքիայում ատոմակայան են կառուցում, ստացվում է՝ այդ ատոմակայանը չի վնասում Թուրքիայի անվտանգությանը, Մեծամորի ատոմակայա՞նն է վնասում։ Դա աբսուրդի ժանրից է»։
Միևնույն ժամանակ մեր զրուցակիցը համարում է, որ Ռուսաստանն ու Թուրքիան համագործակցում են ի վնաս Հայաստանի շահերի․ «Հարավային Կովկասում Ռուսաստանի գլխավոր հենարանը Հայաստանն է, բայց մենք պետք է դրանից ձերբազատվենք։ Եթե Հայաստանը չաջակցի Ռուսաստանին, մեզ որևէ վնաս չի կարող լինել, իսկ օգուտներ միանշանակ հնարավոր են։ Այնքան փորձանք, որքան ռուս դաշնակիցն է թուրքի ձեռքով բերել մեր գլխին՝ ոչ ոք երբեք չի բերել։ Հայաստանում պետք է այդ մասին հստակ պատկերացում լինի»։
Չաքրյանը մեջբերեց օրերս կայացած Էրդողան-Պուտին բանակցությունները։ Թուրքագետը վստահ է, որ որքան էլ պաշտոնական հաղորդագրության մեջ մեր մասին որևէ բան նշված չէ, հայկական հարցերը չէին կարող քննարկման առարկա չլինել․ «Վստահ եմ, որ քննարկվել է նաև Արցախում տիրող իրավիճակը՝ բոլորին պարզ է, թե ինչ կոնտեքստում։Հազիվ թե հայատյացությամբ տառապող Պուտինը Հայաստանի օգտին որևէ քննարկում անցկացնի։ Պարզապես մեր խնդիրը նույնիսկ Պուտինն էլ չէ, արցախյան կլանի կեղտերն են, որոնց Պուտինը օգտագործում է իր նպատակներին հասնելու համար։ Մինչև մենք այդ աղբից չազատվենք՝ որևէ դրական արդյունքի չենք կարող հասնել»,-եզրափակեց նա։
