Հնդկաստանի արտաքին գործերի նախարար Սուբրամանյամ Ջայշանկարը շնորհավորել է Դրաուպադի Մուրմուին երդմնակալության և Հնդկաստանի 15-րդ նախագահի լիազորությունները ստանձնելու կապակցությամբ: Հնդկաստանի ԱԳ նախարարը այդ մասին գրել է Թվիթերի իր էջում:
64-ամյա Դրաուպադի Մուրմուն դարձավ երկրորդ կին նախագահը Հնդկաստանի պատմության մեջ և այսպես կոչված՝ «ցեղային համայնքը» ներկայացնող առաջին նախագահը, ինչը պատմական իրադարձություն է համարվում Հնդկաստանում: Նա ծնվել է հնդկական հեռավոր ծայրամասում, եղել է գործավարուհի, ուսուցչուհի, զբաղեցրել է բարձր պաշտոններ Հնդկաստանի կառավարությունում: Ծնողները նրա անունը դրել էին հնդկական հնագույն էպոսի հերուսուհու՝ Դրաուպադի թագուհու պատվին: Այժմ նա զբաղեցնելու է երկրի թիվ մեկ պաշտոնը:
Մուրմուն հաղթել էր հուլիսի 18-ին տեղի ունեցած ընտրություններում՝ առաջ անցնելով ընդդիմության թեկնածուից՝ ֆինանսների նախկին նախարար Յաշվանթ Սինհայից և ստանալով 2824 ձայն կամ ընտրական քվեների ավելի քան 64 տոկոսը: Հուլիսի 25-ին տեղի է ունեցել նորընտիր նախագահի երդմնակալության արարողությունը: Նրա թեկնածությունը առաջադրվել էր իշխող Հնդկական ժողովրդական կուսակցության («Բհարաթիա ջանաթա փարթի») գլխավորած Ազգային-ժողովրդավարական դաշինքի կողմից: Նախագահի պաշտոնում Դրաուպադի Մուրմուն կփոխարինի Հնդկաստանի 14-րդ նախագահ Ռամ Նաթհ Քովինդին:
Հնդկական Ջհարկհանդ նահանգի նախկին նահանգապետ Դրաուպադի Մուրմուն դարձավ երկրորդ կին նախագահը Հնդկաստանի պատմության մեջ և առաջինը Հնդկաստանի նախագահներից, որը ներկայացնում է Հնդկաստանում խտրականության ենթարկվող տեղաբնիկ ցեղերի ցուցակում «գրանցված» ցեղերից մեկը: Նա մասնավորապես Սանտալների ցեղից է:
Այս փաստը հաշվի առնելով՝ Հնդկաստանի ԱԳ նախարար Սուբրամանյամ Ջայշանկարը շեշտել է, որ հուլիսի 25-ը շատ առումներով պատմական օր է, որը վերահաստատում է Հնդկաստանի անսասան հավատարմությունը ներառական ժողովրդավարությանը:
Նորընտիր նախագահին շնորհավորել է նաև Հնդկաստանի վարչապետ Շրի Նարենդրա Մոդին՝ Թվիթերում գրելով. «Հնդկաստանի դուստրը, որը սերում է ցեղային համայնքից և ծնվել է արևելյան Հնդկաստանի հեռավոր հատվածում, ընտրվել է մեր երկրի նախագահ»:
Հնդկաստանում գործում է խորհրդարանական կառավարման համակարգը: Գործադիր իշխանությունը ղեկավարում է վարչապետը, սակայն նախագահը մեծ դեր է խաղում կառավարության ձևավորման գործընթացում և կարող է կրկնակի քվեարկության ուղարկել խորհրդարանական նախագծերը: Նախագահին Հնդկաստանում ընտրում են շուրջ 4500 օրենսդիրներ, որոնք ներկայացնում են ազգային խորհրդարանը և նահանգային խորհրդարանները: Նախագահը Հնդկաստանում ընտրվում է հինգ տարի ժամկետով:
Դրաուպադի Մուրմուն ծնվել է 1958 թ. հունիսի 20-ին Հնդկաստանի արևելյան Օրիսա նահանգի Ռայռանգպուր քաղաքում: Նա սերում է Սանտալների փոքր ցեղից: Հնդկաստանի նորընտիր նախագահին անվանակոչել են հնդկական հնագույն «Մահաբհարաթա» էպոսի գլխավոր հերոսուհու՝ Դրաուպադի թագուհու պատվին: Նախքան քաղաքականությամբ զբաղվելը նա աշխատել է գործավարուհի տեղական ինքնակառավարման մարմիններում, այնուհետև եղել է ուսուցչուհի: 2000-ական թթ. նա տարբեր պաշտոններ է զբաղեցրել Հնդկաստանի կառավարությունում, 2015-2021 թթ. եղել է Ջհարկհանդի նահանգապետը: