Օրերս Արսեն Թորոսյանը հայտարարեց, որ կորոնավիրուսի համաճարակի մեծ բռնկումներ են սկսել նկատվել տարբեր երկրներում։ Կանխատեսումներ կան, որ աշնանը մեծ ալիք է լինելու, քանի որ պատվաստումների գործընթացը ողջ աշխարհում դանդաղել է, իսկ իմունիտետը երկար չի պահպանվում։ Ամբողջ աշխարհն էլ նորից ուզում է անցնել դիմակներ կրելուն, քանի որ ինչպես նշեցինք՝ մեծ ալիքի վտանգը մեծացել է։
Այս մասին «Առաջին լրատվական»-ը խոսել է համաճարակաբան Դավիթ Մելիք-Նուբարյանի հետ, որի խոսքով՝ կոռոնավիրուսը դարձել է մարդկության շրջանում շրջանառվող հերթական վիրուսներից մեկը, որը պարբերաբար առաջացնելու է բռնկումներ, այսինքն՝ որևէ նոր բան չկա։ Հերթական բռնկումն էլ պայմանավորված է լինելու՝ մարդկանց միջև շփումների ավելացմամբ, իսկ դա առավելապես լինում է աշնան ամիսներին, երբ մարդկանց մեծամասնությունը արձակուրդից վերադառնում է աշխատանքի, ուսման։ Սակայն այստեղ կա երկրորդ գործոնը ևս, մեծ նշանակություն ունի, թե ինչպես իրեն կդրսևորի վիրուսը։ «Պարբերաբար հետևում ենք վիրուսի զարգացմանը, դրա տեսակների առաջացմանը, փորձում ենք հասկանալ որքան վտանագվոր է այն դառնում, սակայն հեռու գնացող հետևություններ անել դեռ չենք կարող, ամեն բան պարզ կդառնա հետազոտության ընթացքում։ Փաստ է այն, որ Եվրոմիության երկրներից շատերում նկատվում է հիվանդացության երեսուն տոկոսի աճ, սակայն նույնը չենք կարող ասել մահերի մասով, մահերը, բարեբախտաբար, քիչ են։ Հետազտում ենք վիրուսի ի հայտ եկած նոր տարբերակները՝ հասկանալու՝ որքան վտանգավոր են դրանք մարդկության համար։ Մարդիկ, չնայած ամեն ինչին, պետք է հետևեն հակահամաճարակային պայմաններին, ձեռքերի հիգիենային»,- ասում է Նուբարյանը։
Շատ կարևոր է, որ մարդիկ հասկանան, որ այո՛, դիմակը օգտակար միջոց է վիրուսի դեմ պայքարելու, սակայն դա արդյունավետ է միայն այլ հակահամաճարակային միջոցառումների ներդրման հետ միասին։ Դիմակները լիարժեք չեն պաշտպանում հիվանադանալուց, որոնց մասին վկայում են համաճարակային հիվանդացության թվերը։ Ինչպես նշում է համաճարակաբանը՝ ցավոք, մեր քաղաքացիներն անգամ դիմակը ճիշտ չեն օգտագործում․ շատերս գիտենք, որ այդ մեկանգամյա օգտագործման դիմակները որոշներն օգտագործում են մի քանի անգամ, որն էլ նվազեցնում է դիմակի արդյունավետությունը։
Մասնագետները պատվաստումների միջոցով փորձում են պաշտպանել մեզ վիրուսի տարատեսակներից։ Սա մրցավազք է ժամանակի դեմ, որտեղ հաճախ վարակն ավելի արագ է փոխվում, քան գիտականները հասցնում են արձագանքել։ Նշենք, որ ըստ մասնագետների՝ առկա պատվաստանյութերը պաշտպանում են մարդկանց վիրուսի գոյություն ունեցող տեսակներից։
Վերջերս հրապարակվել է նաև պատվաստանյութի հետ կապված ցուցումներ, ըստ որի՝ առաջին խթանիչ դեղաչափը խորհուրդ է տրվում ստանալ բոլորին, սակայն երկրորդի պարագայում կան որոշակի նրբություններ ու հակացուցումներ, այսինքն՝ ոչ բոլորը կարող են ստանալ, խորհուրդ է տրվում՝ 60-ից բարձր տարիքային խմբին և հիվանդության զարգացման ծանր ռիսկի գործոններ ունեցող մարդկանց, օրինակ՝ քրոնիկական և իմունային համակարգի հետ խնդիրներ ունեցող հիվանդներին։
Լուսանկարը՝ Photolure-ի
