ԱՄՆ-Իսրայել հարաբերությունն ուժեղ է ինչպես երբևէ, Իսրայելում հայտարարել է ռեգիոնալ այցով այդ երկիր ժամանած ԱՄՆ նախագահ Ջո Բայդենը: Նրա խորհրդական Ջեք Սալիվանը հայտարարել է, որ ամերիկա-իսրայելական հարաբերությունը կախված չէ Իսրայելում կամ ԱՄՆ-ում իշխանության աթոռին նստողից, քանի որ դա երկու պետության և երկու ժողովրդի հարաբերությունն է: Բայդենը մեծ աջակցություն է հայտնել Իսրայելին, այդ թվում «Երուսաղեմի հռչակագրով», որ ստորագրվել է նրա այցի ընթացքում և որը վերաբերել է երկկողմ հարաբերության սերտացմանը՝ անվտանգության ոլորտից մինչև տնտեսություն:
Ամերիկա-իսրայելական այդ «ակցիայի» բուն թիրախը կամ հասցեատերը Իրանն է, որի վերաբերյալ Բայդենը հայտարարել է նաև, որ ԱՄՆ-ը պատրաստ է կտրուկ քայլերի՝ եթե Թեհրանը գնա միջուկային սպառազինություն ստեղծելու: Կտրուկ քայլերն իհարկե անելու է Իսրայելը, ԱՄՆ-ը հայտնում է աջակցությունը դրան: Դա շանտա՞ժ է Թեհրանի նկատմամբ, որը հուլիսի 19-ին ընդունելու է Պուտինին և Էրդողանին, թե՞ Վաշինգտոնը իրապես տալիս է Իսրայելին կտրուկ քայլերի, այլ կերպ ասած Իրանին հասցվող հարվածների գնալ, եթե Թեհրանը խիստ մոտենա միջուկային սպառազինությանը: Ամերիկա-իսրայելական խաղի տրամաբանությունն էապես կանխորոշելու է թե մերձավորարևելյան, թե կովկասյան ռեգիոնի անվտանգության ռեժիմի հետագա ծավալումը՝ դեպի լարու՞մ, թե՞ հանգուցալուծում:
Իհարկե Կովկասի իմաստով ազդեցության անմիջականությունը կարող է լինել մի փոքր հարաբերական, սակայն այդուհանդերձ Բայդենի մերձավորարևելյան այցի և Իսրայելի հետ պայմանավորվածությունների հանգամանքը կարող է զգալիորեն կանխորոշել Թուրքիայի և Ադրբեջանի վարքագիծը: Բաքուն և Անկարան կփորձեն ավելի շուտ պայմանավորվել Մոսկվայի ու Թեհրանի՞, թե՞ Վաշինգտոնի և Թել Ավիվի հետ, որոնց իհարկե Կովկասում հետաքրքրում է մի առանցքային հարց՝ Իրանի հյուսիսային սահմանի «պաշարման» տրամաբանություն ապահովելն ու այդ կերպ Թեհրանին զիջման մղելը: Այդ պարագայում առաջանում է ռիսկ, որ կարող է դրվել ռուս-իրանական կապը կտրելու օրակարգային հարց՝ իրագործման մեթոդների հնարավոր բազմազան, սակայն թերևս Հայաստանի համար վտանգավոր տարբերակներով, որովհետև, այդպիսի հարցադրման պարագայում լուծումը թերևս բոլոր դեպքերում փնտրվելու է Հայաստանի հաշվին: Ամերիկա-իսրայելական քննարկումների ամբողջական ներուժը էապես կախված է լինելու Ջո Բայդենի Սաուդյան Արաբիա այցից: Եթե ԱՄՆ նախագահին հաջողվի Սաուդյան իշխանությանը բերել Իրանի և Ռուսաստանի դեմ գործողությունների կոալիցիայի՝ բարձրաձայնված, թե ոչ, ապա դա թերևս մեծ հավանականությամբ կարող է առաջացնել կոալիցիան կովկասյան խաղացողով համալրելու աշխույժ մոտիվ:
