Ադրբեջանական ռազմական փորձագետները 44-օրյա պատերազմի մարտական արդյունքների վերլուծություններում հետաքրքիր տվյալներ են հրապարակել, մասնավորապես, թուրքական անօդաչուների, այդ թվում՝ Բայրաքթարների կիրառության հետ կապված: Մեր կորուստները կազմում են 88 տանկ, 64 զրահամեքենա, 137 քարշակվող և 17 ինքնագնաց հրետանային համակարգեր, հակաօդային պաշտպանության զենիթա-հրթիռային 21 համալիրներ Оса, Стрела-10 և Тор-М2КМ, հակաօդային պաշտպանության 6 ռադարներ, 2 Эльбрус օպերատիվ-տակտիկական հրթիռային համալիրներ, 2 С-300 զենիթա-հրթիռայաին համալիներ, 185 բեռնատար և այլ տրանսպորտային միջոցներ:
Քաղաքական վերլուծաբան Վարդան Բալյանը ֆեյսբուքյան իր էջում, անդրադառնալով այս տվյալների հրապարակմանը, նշել էր, որ այստեղից կարելի է արձանագրել՝ Bayraktar ТВ2 ֊ը հիմնականում ապահովել է թիրախային նշանավորման տվյալների փոխանցում հրետանային միջոցներին, այդ թվում՝ իսրայելական Spike-LR հրթիռային համակարգերի, որոնց կրակային հեռավորությունը կազմել է 32 կիլոմետր: Հատկանշական է, որ թշնամին բացահայտ խոստովանում է, որ կիրառված մարտավարությունը հաշվի է առել 2016 թվականի ռազմական գործողությունների փորձը:
Արձանագրում երրորդ, ադրբեջանական բանակի մարտական ոգին բարձրացնելու համար առաջնահերթ խնդիր է ապահովել հայկական զինված ուժերի մարտունակության անկում հոգեբանական բաղադրիչի մասով, ինչ էլ հանդիսանում է Բայրաքթարների և այլ անօդաչու միջոցների գլխավոր խնդիրը:
Այս առնչությամբ, ԱԺ պաշտպանության և անվտանգության հարցերի մշտական հանձնաժողովի փորձագետ Արծրուն Հովհաննիսյանը, «Առաջին լրատվական»-ի հետ զրույցում նշեց, որ ադրբեջանական քարոզչամեքենան շատ հաճախ նաև մեր թեթև ձեռամբ, Ադրբեջանի զինված ուժերում ներառված շատ ավելի որակյալ իսրայելական գերճշգրիտ խոցման միջոցների աշխատանքի մեծ մասը վերագրվեց «Բայրաքթարներին»:
«Դա զուտ հարվածների արդյունավետության մասով վերագրվեց, էլ չեմ ասում «Բայրաքթարի» աշխատանքի համար նախապայման հանդիսացող իսրայելական հետախուզական ԱԹՍ-ների, կրակի կառավարման ԱԹՍ-ների աշխատանքն էլ անտեսվեց ընդհանրապես, և Բայրաքթարից» կերտվեց սուպեր զենքի մի կերպար, որը մեղմ ասած, ճիշտ չի: Էլ չեմ ասում, որ բայրաքթարանման ԱԹՍ-ների ՕԳԳ-ն, որոնց համար թռւիչքուղի է անհրաժեշտ, առանց սեփական կործանիչ ավիացիայի ապահովման, շատ ցածր է: Այսինքն եթե սեփական կործանիչներն օդում գերակայության խնդիրը չլուծեցին, նման ԱԹՍ-ին շատ արագ կխոցեն, ինչպես ռուսները խոցում էին ուկրաինական ԱԹՍ-ներին:
Հիմա «Բայրաքթարների» համար այդ դերը կատարեցին թուրքական F-16-ները: Բայց այդ ամենը չի ներկայացվում ոնց որ պետք է, որովհետև «Բայրաքթարը» որպես թուրք-ադրբեջանական բիզնես պրոյեկտ, ինքը փիառվեց, մենք էլ այդքան գրագիտություն չունեցանք, որ դա ճիշտ բացատրեինք: Դա աշխարհն ընդունեց, և դրա շնորհիվ սկսեցին «Բայրաքթարները» շատ գնել, այդ թվում Ուկրաինան: Այնպես որ ես խիստ կասկածելի եմ համարում «Բայրաքթարների» բարձր ՕԳԳ-ն»,-ասաց Արծրուն Հովհաննիսյանը:
Նրա խոսքով, «Բայրաքթարների» գովազդի առաջին ծաղիկը թուրքական «Օրուքս» հարթակն էր. «Այդ հարթակն այսօր էլ Ուկրաինայում է այդ ստատիստիկան իրականացնում: «Օրուքսը» հաստատում էր մոտ 550 հայկական վերգետնյա տեխնիկայի կորուստ, որոնց ծանրակշիռ մեծամասնությունը վերագրվում էր «Բայրաքթարին»: Որն էլ չէր վերագրում «Բայրաքթարին», նշվում էր, որ զուգահեռ նաև Բայրաքթարն է աշխատել: Այսինքն ստացվում է, որ գրեթե ոչ մի հայկական միջոց չի խոցվել առանց «Բայրաքթարի» մասնակցության: Իհարկե, դա այդպես չէ, դա PR է: Դե իրենք այսօր հաղթող կողմ են, ինչ ուզեն՝ կնկարեն: Իսկ իսրայելական զենքերը այդքան գովազդի կարիք չունեն, դրանք աշխարհում շատ են գովազդվել»:
Դիտարկմանը, որ պատերազմի ժամանակ Ադրբեջանը խնդիր էր դրել չեզոքացնել հայկական ՀՕՊ համակարգը, Արծորւն Հովհաննիսյանն ասաց. «Այո, բայց հայկական ՀՕՊ համակարգը, ոչ մի կապ չունի «Բայարաքթարի» հետ: ՀՕՊ համակարգերի չեզոքացման մեջ ավելի շատ դեր են խաղացել իսրայելական զենքերն ու միջոցները»:
Հարցին, թե արդյոք 44-օրյա պատերազմի հանգամանքներն ուսումնասիրող քննիչ հանձնաժողովի աշխատանքի արդյունքում կլինեն իրենց սխալների, թերացումների համար պատասխան տվողները, նա պատասխանեց. «Ես այդ հանձնաժողովում աշխատում եմ և ամեն ինչ անելու եմ և ջանք չեմ խնայելու, որ բոլոր թերացողները, մեղավորները իրենց չափով կրեն պատասխանատվություն: Հանձնաժողովի մասնագիտական գնահատականները կլինեն բացահայտումների մասով, որոնց արդեն պետք է հետևի իրավական աշխատանքը: Հանձնաժողովը մասնագիտական գնահատական տվողն է, բայց քրեական գործ հարուցող, քննություն իրականացնող մարմին չէ»:
