ԱՄՆ արևելյան ափի 2 մլն 300 հազար բնակիչ մոտ ժամանակներս կտարհանվեն` «Այրին» փոթորիկի մոտենալու հետ կապված: Մասնավորապես, Նյու Ջերսի նահանգում իրենց տները լքելու հրաման են ստացել 1 մլն մարդ, Մերիլենդում` 315 հազար, Վիրջինիայում` 200 հազար և 100 հազար՝ Դելավերում: Հյուսիսային Կարոլինայում, որը առաջինը կդիմավորի աղետի հարվածը մոտակա ժամերին, տարհանվել են 300 հազար բնակիչներ, հայտնում է ИТАР-ТАСС-ը:
«ԱՄՆ ողջ պատմության մեջ սա բնակչության ամենամեծ թիվն է, որը հայտնվել է վտանգի մեջ փոթորիկի պատճառով»,- հայտարարել է Ֆլորիդայի Պետական համալսարանի պրոֆեսոր Ջեյ Բեյքերը: Փոթորիկների հետազոտման կենտրոնի գնահատականներով, «Այրին» փոթորիկը իրենց վրա կզգան մոտ 65 մլն մարդիկ:
Նյու Յորքում, որի վրայով ուժեղագույն ցիկլոնը կանցնի կիրակի, տարհանման հրաման ստացել են ավելի քան 270 հազար ափամերձ բնակիչներ: Ինչպես խոստովանում են տեղի բնակիչները, այսպիսի բան վաղուց չի եղել:
Մարդաշատ պուրակները դատարկ են, իսկ խանութները, հակառակը`լցված են մարդկանցով, որոնք ձգտում են գնել խմելու ջուր, պահածո և մարտկոցներ` այս օրերին սրանք ամենավաճառվող ապրանքներն են:
