Արձակուրդից հետո դեռահասին կտրուկ ուսումնադաստիարակչական դաշտ տեղափոխել չի կարելի: Այսօր լրագրողների հետ հանդիպման ժամանակ նման խորհուրդ տվեց հոգեբանական գիտությունների թեկնածու, դոցենտ Ռուբեն Պողոսյանը` խոսելով դեռահասների հետարձակուրդային սթրեսային իրավիճակներից:
«Դեռահասությունը դժվար դաստիարակելի և ուսուցանելի տարիք է, այդ պատճառով զգույշ պետք է լինեն ծնողներն ու ուսուցիչները, պետք է նուրբ աշխատեն դեռահասների հետ` հասկանալով նրա խնդիրներն ու մտահոգությունները»,- մեկնաբանեց Ռ. Պողոսյանը` ընդգծելով, որ այսպիսի մոտեցումը կպակասեցնի դեռահասի հոգեբանական լարվածությունը:
Նա նաև նշեց, որ ժամանակից շուտ երեխայի վզին պատասխանատվության զգացում չի կարելի փաթաթել, քանի որ այդ դեպքում նրա մոտ առաջանում են ագրեսիվ դրսևորումներ:
Խոսելով հետարձակուրդային սթրեսներից` հոգեբան Մարինե Ավետիսյանը համատեղ ասուլիսում նշեց, որ հոգեբանության մեջ կա հետարձակուրդային սինդրոմ, երբ մարդը խոր հանգստից հետո տեղափոխվում է աշխատանքային միջավայր: «Սա համընդհանուր երևույթ է, խոսքը կենսառիթմի խանգարման մասին է: Շատ մարդիկ ամառային հանգստից հետո ընկնում են աշնանային սթրեսի մեջ, և ստեղծվում է տխուր վիճակ»,- շարունակեց հոգեբանն`ընդգծելով, որ ընդամենը պետք է սահուն դարձնել հանգիստ-աշխատանք փոփոխությունը և շուտ հաղթահարել:
Ի զարմանս շատերի, Ռ. Պողոսյանը նշեց, որ սթրեսները ոչ միշտ են դիտարկվում որպես բացասական երևույթ: «Եթե մարդը չունի լարվածություններ, ուրեմն արդեն մահացած է, սա շատ կարևոր տարր է մարդու կյանքում, ընդամենը պետք է կանխել լարվածությունները»,- մեկնաբանեց հոգեբանական գիտությունների թեկնածու Ռ. Պողոսյանը:
Անդրադառնալով դպրոցականների` դասերին առավոտյան շուտ հաճախելու փաստին, նշեց, որ հանուն սոցիալական դժվարությունների չի կարելի խոցել երեխայի հոգեբանությունը: «Պետք է կարգավորվեն բոլոր աշխատաժամերը, ես չեմ կարծում, որ ընդունված որոշումը ճիշտ է. երեխան տուժում է»,- նման կարծիք հայտնեց նա:
