«Աերոֆլոտ»-ը նախատեսում է 300 ինքնաթիռ պատվիրել United Aircraft Corporation-ից (UAC, Rostec State Corporation-ի մաս): Կողմերը մտադիր են համապատասխան շրջանակային համաձայնագիրն ստորագրել այս տարվա հունիսին՝ Սանկտ Պետերբուրգի միջազգային տնտեսական ֆորումի (SPIEF) շրջանակներում։ Խոսքը Sukhoi Superjet 100, MS-21 և Tu-214 ինքնաթիռների մասին է։
Մյուս կողմից ռուսական և արևմտյան մամուլում բազմաթիվ հրապարակումներ կան Սուխոյ օդանավերի տեխնիկական գործարանային անսարքությունների մասին և անվտանգության տեսանկյունից դրանք մեկ անգամ չէ, որ խնդիրներ կարող են առաջացնել։
Այս առնչությամբ, «Առաջին լրատվական»-ի հետ զրույցում ավիացիոն հարցերով փորձագետ Նավիկ Խաչատրյանը նշեց, որ ընտրվել են ռուսական օդանավերը, որովհետև Արևմուտքից չեն կարող բերել. «Ռուսակամը միայն «Սուխոյ»-ը չի, նաև MS-21 օդանավերն են, որոնք ավելի շատ միջին մագիստրալ օդանավեր են, «Էյրբաս 320»-ը կամ «Բոինգ 738»-երը: Այստեղ խնդիրն այն չէ, որ դրանք լավ օդանավեր չեն, նման բան չկա:
Օդանավին կամ սերտիֆիկատ է տրվում, կամ չի տրվում: Եթե տրվել է, ուրեմն լավն է: Այստեղ խնդիրը երկրորդ՝ ավելի կարևոր մասն է. ամբողջ ռուսական օդանավերի գլխուղեղային մասը արտադրվում է դրսում, հիմնականում ԱՄՆ-ում: Եթե հիմա այդ մասը չի տեղափոխվում Ռուսաստան, որ դնեն օդանավերի վրա, այդտեղ իրենք խնդրի առաջ են կանգնում: Եթե խնդիր լինի թռիչքից առաջ ուղեղային մասի հետ կապված, այդ օդանավն ուղղակի չի թռչի: Դա կբերի նրան, որ այդ օդանավը չի գործածվի, քանի որ փոխարինող չկա, որ զարտուղի ճանապարհներով փորձեց ԱՄՆ-ից բերես Ռուսաստան»,-ասաց նա:
Նավիկ Խաչատրյանը հավաստիացրեց, որ «Սուխոյ»-ը լավ օդանավ է, հատկապես, որ վերջին 10 տարիներին նրանց շարժիչները նորացվել են, բայց փոխարինող չկա. «Այսինքն եթե այդ շարժիչի ցիկլը անցավ, օրացուցային ժամկետը լրացավ, դա պետք է փոխվի, բայց որտե՞ղ փոխեն, եթե գործարանները ԱՄՆ-ում են կամ Ֆրանսիայում: Առանց փոխելու իրավունք չունեն շահագործել: Ամբողջ խնդիրն այն է, որ իրենք պահեստամասերը փոխելու այլընտրանքը չունեն:
«Սուխոյ սուպերջեթ»-երը հրաշալի օդանավ են, նրանք ջոյսթիքով են ղեկավարվում, ինչպես «Էյրբաս»-երը: Մեր դժգոհությունը միայն այն է, որ պահեստամասերը շատ թանկ էին: Դրա համար ժամանակին «Արմավիայի» ղեկավարը հետ վերադարձրեց այդ օդանավերը»,-ընդգծեց Նավիկ Խաչատրյանը:
