Այսօր տեղի է ունեցել 44-օրյա պատերազմի հանգամանքները ուսումնասիրող քննիչ հանձնաժողովի նիստը։ Հանձնաժողովի նախագահ, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը «Առաջին լրատվական»-ի հետ զրույցում նշեց, որ քննիչ հանձնաժողով հրավիրյալների մեծ ցանկ է հաստատվել, աշխատանքի ընթացքում կարող է ցանկը փոփոխման ենթարկվել, նոր մարդիկ համալրվեն։ Արցախից էլ կլինեն հրավիրյալներ, այդ թվում՝ նախագահ Արայիկ Հարությունյանը։
«Քննիչ հանձնաժողովն այս պահին ունի 10.000-ից ավելի փաստաթուղթ, աշխատում ենք նաև պաշտպանության գերատեսչության հետ։ Երկուշաբթի արդեն նամակներ կուղարկեմ նրանց, որոնք հունիսին պիտի գան հանձնաժողով և պետք է պատասխանեն հարցերին»,-ասաց Քոչարյանը։ Նրա խոսքով՝ բացահայտումները պետք է առողջացնեն բանակը, որը տևական ժամանակ բացթողումների թնջուկ է, որ երբ էլ լինեին պատերազմական գործողություններ, դրանք չէին կարող հաջողությամբ պսակվել։
Հանձնաժողովի նախագահը նշեց, որ սկսելու են բանակցային գործընթացից, և հյուրերի ցանկում լինելու են այդ գործընթացին քաջատեղյակ բոլոր մարդիկ՝ ներառյալ վարչապետ Նիկոլ Փաշինյանը և պատերազմի ժամանակ ԱԳ նախարարը։
«Շատ հնարավոր է, որ առաջին հյուրը լինի բանակցային գործընթացից շատ լավ տեղյակ պաշտոնյա և այդպես շարունակ, որովհետև պատերազմն ինչ-որ բանի արդյունք էր, մենք պետք է հասկանանք՝ ինչ էինք անում և ինչ ակնկալիք ունեինք, որը իրականություն չդարձրինք, որի արդյունքում հակառակորդը ունեցավ հնարավորություն 2016-ին լոկալ բնույթի պատերազմով զգուշացնել, դրանից հետո երկու տարի ժամանակ ունեինք բանակը բերելու որոշակի վիճակի, որն անհնար էր լինելու, քանի որ հակառակորդը հսկայական գումարներ էր ծախսում, զինում էր բանակը, իսկ մենք պարզապես հույսներս դրել էինք, որ բանակցությունների միջոցով ստատոս քվոյի սառեցման փուլը դեռ երկար կպահենք»,-ասաց նա։
