Վաղը 44-օրյա պատերազմի հանգամանքներն ուսումնասիրող քննիչ հանձնաժողովը նիստ կգումարի: Հանձնաժողովի նախագահ, Աժ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն ասում է, որ լայնածավալ նյութեր են ստացել և շարունակում են ստանալ առավելապես ուժային կառույցներից։ Նրա խոսքով՝ փորձագետների ուսումնասիրությունները շարունակական և ծանրակշիռ փուլում են։ Այս պահին հաստատում են հրավիրյալների ցանկը: Ավելի վաղ գրել էինք, որ 44-օրյա պատերազմի հանգամանքներն ուսումնասիրող քննիչ հանձնաժողովից հեռացել է Արցախի Հանրապետության անվտանգության խորհրդի նախկին քարտուղար Սամվել Բաբայանը։ Նա նշել էր, որ այսպիսի որոշման հանգելու պատճառները մի քանիսն են, բայց հիմա չի ուզում բարձրաձայնել, կգա օրը, կբարձրաձայնի: Սակայն նշել էր, որ կան խաղի կանոններ, որոնք խախտվել են, իսկ եթե խաղի կանոնները չեն պահպանվում, չի ստացվում:
Արտախորհրդարանական մյուս երկու՝ «Ինքնիշխան Հայաստան» և «Արդար Հայաստան» կուսակցությունները, որոնք ներգրավված են հանձնա-ողովի աշխատանքներին, դեռևս վերջնական որոշում չունեն՝ կշարունակե՞ն մնալ հանձնաժողովում, թե ոչ:
«Ինքնիշխան Հայաստան» կուսակցության առաջնորդ Դավիթ Սանասարյանը «Առաջին լրատվական»-ի հետ զրույցում նշեց, որ իր համար համար հանձնաժողովի անդրանիկ նիստը ուրբաթ օրն է, ինքը մասնակցելու է անդրանիկ նիստին.«Մի շարք հարցեր կան, գնալու եմ, որ հասկանամ: Առաջին նիստից հետո նոր վերջնական որոշում կկայացնեմ՝ մանսակցելու եմ, թե չեմ մասնակցելու: Ինձ համար էլ, Նորիկյանի համար էլ հարցեր կան, որ պետք է գնանք, հասկանանք: Տեխնիկական ու իրավական խնդիրներ կան, որ պետք է վերջնական հասկանանք»,-ասաց Սանասարյանը:
Հարցին, թե արդյոք պատճառն այն է, որ արտախորհրդարանական ուժերը զրկված են քվեարկելու իրավունքից, Սանասարյանը նշեց. «Առնվազն ցանկացած հարց, որ մենք ցանկանանք տալ, տալու ենք այդ հարցերը: Որևէ մեկը մեզ չի ասելու՝ այդ հարցը դուք իրավունք չունեք տալու: Կապ չունի՝ մենք քվեարկելու իրավունք ունենք, թե ոչ: Մենք ծանոթանալու ենք նյութերին այն ծավալով, որ ծավալով ծանոթանալու են հանձնաժողովի անդամները»:
Նրա խոսքով՝ եթե արտախորհրդարանական ուժերը չմասնակցեն հանձնաժողովի աշխատանքներին, դա խնդրահարույց է, որովհետև կստացվի, որ իշխանությունը մենակ կմնա:
«Այս հանձնաժողով ստեղծելու գաղափարն իմն է եղել և ես շահագրգռված եմ եղել: Չմասնակցելով ես ի՞նչ եմ ստանում, առհասարակ բազմաթիվ հարցեր կան, որոնց պատասխանները հետաքրքրում են ինձ: Ինձ համար դա է կարևոր, որ եթե մասնակցում եմ, ինչքանով է ինձ համար քարտեզը պարզ լինում: Իմ աշխատանքից էլ շատ բան է կախված»,-հավելեց Սանասարյանը:
Անդրադառնալով Սամվել Բաբայանի որոշմանը՝ նան նշեց, որ Սամվել Բաբայանին կարելի է հրավիրել որպես այն ժամանակվա Արցախի Անվտանգության խորհրդի քարտուղար.«Բնականաբար, ես Սամվել Բաբայանի հետ որևէ խնդիր չունեմ, իր հետ աշխատելու եմ: Եթե ինքը հրավիրվի, գա հարցերի պատասխանի, ես վստահ եմ, որ ինքը նաև այնտեղ հարցեր կբարձրացնի»:
«Արդար Հայաստան» կուսակցության առաջնորդ Նորայր Նորիկյանն էլ «Առաջին լրատվական»-ի հետ զրույցում նշեց, որ իր՝ հանձնաժողովում մնալ-չմնալու հարցին կանդրադառնա առաջիկայում:
