Թուրքական Zaman թերթի փոխանցմամբ՝ Թուրքիայի հարավարևելյան հատվածում ընկած Հաքքարի նահանգում՝ շրջկենտրոնից 4 կիլոմետր հեռավորության վրա, «Քրդստանի աշխատավորական կուսակցության» (PKK) զինյալները պայթեցրել են թուրք զինծառայողներին տեղափոխող քաղաքացիական միկրոավտոբուսը։
Հաքքարիի նահանգապետ Մուամեր Թյուրքերը հայտնել է, որ միկրոավտոբուսի վրա նետված ռումբի պատճառով այն շրջվել է, ինչի արդյունքում վիրավորվել է 2 զինծառայող։ Բացի այդ, թեթև մարմնական վնասվածքներ են ստացել ևս 13 զինծառայողներ։
Պայթյունից հետո ճանապարհը փակվել է, ձեռնարկվել են լայնամասշտաբ անվտանգության միջոցառումներ։ Երկրորդ պայթյունի կանխման համար դեպքի վայր է ժամանել սակրավորների խումբը։
Հիշեցնենք, որ որոշ տվյալներով՝ PKK-ն Հաքքարիում ունի 16 ճամբար։
