Washington Post-ը գրում է, որ ԱՄՆ-ն 100 անգամ ավելի քիչ է ծախսել լիբիական 4-ամսյա պատերազմում, քան վճարում է Աֆղանստանում մեկ տարվա ներկայության համար: Թերթը, հղում անելով Պենտագոնի տվյալներին, նշում է, որ ԱՄՆ Լիբիայի պատերազմում 4 ամսվա մեջ ծախսել է 896 միլիոն դոլար /հուլիսի 31-ի դրությամբ/: Միաժամանակ նշվում է, որ 2012 թվականին Աֆղանստանում մեկ տարվա ներկայության համար ԱՄՆ-ն ստիպված ծախսելու է մոտ 100 անգամ շատ` 107 միլիարդ դոլար: Թերթի հաշվարկներով, եթե Լիբիայում քաղաքացիական պատերազմը շարունակվեր, ապա մեկ տարվա ընթացքում ԱՄՆ-ը ստիպված ծախսելու էր 2.7 միլիարդ դոլար:
Միայն Աֆղանստանում ու Իրաքում ԱՄՆ-ն ծախսել է մոտ 1.3 տրիլիոն դոլար, իսկ ահա Լիբիայի դեպքում, ըստ հոդվածի հեղինակի, ԱՄՆ-ն կոպեկներ է ծախսել:
Ավելի վաղ ԱՄՆ պաշտպանության նախկին նախարար Ռոբերտ Գեյթսը հայտարարել էր այն մասին, որ NATO-ի ապագան կասկածի տակ է, քանի որ ԱՄՆ-ն հոգում է Հյուսիսատլանտյան դաշինքի ծախսերի 75%-ը:
