Մարտին ԵՄ չորս առանցքային շուկաներում, ռուս-ուկրաինական պատերազմի և մատակարարումների խափանումների համատեքստում, մարդատար ավտոմեքենաների վաճառքները շարունակել են նվազել՝ Իսպանիայում՝ 30,2%-ով, Իտալիայում՝ 29,7%-ով, Ֆրանսիայում՝ 19,5%-ով, Գերմանիայում՝ 17,5%-ով։ Այս մասին չորեքշաբթի՝ ապրիլի 20-ին, հայտարարել է Եվրոպական ավտոարտադրողների ասոցիացիան (ACEA): Մեկ ամսում Եվրամիությունում վաճառվել է ընդամենը 844․187 ավտոմեքենա (-20,5%)։
Առաջին եռամսյակի արդյունքները նույնպես հիասթափեցնող են: Նախորդ տարվա նույն ժամանակահատվածի համեմատ՝ նոր մեքենաների գրանցումը նվազել է 12,3%-ով։ Ընդհանուր առմամբ, հաշվառվել է 2․245․976 ավտոմեքենա։ Նվազում նկատվել է բոլոր չորս երկրներում՝ Իտալիայում (-24,4%), Ֆրանսիայում (-17,3%), Իսպանիայում (-11,6%) և Գերմանիայում (-4,6%)։ Վաճառքի անկում է գրանցվել նաև 2021թ: Այն բացատրվում էր հիմնականում գլոբալ համաճարակի համատեքստում կիսահաղորդիչների պակասով։
Այսպիսով, 2021 թվականի սեպտեմբերին Եվրամիությունում վաճառվել է 700 հազարից մի փոքր ավելի նոր ավտոմեքենա, որն այս ամսվա նվազագույն ցուցանիշն է 26 տարվա ընթացքում։ Հիմնական խնդիրը մատակարարման շղթաների խափանումն է։ Միկրոչիպերի խոշորագույն արտադրողները Ասիայում են, մասնավորապես՝ Հարավային Կորեայում, Ճապոնիայում և Չինաստանում։ Ավտոարտադրողները երկար ժամանակով դադարեցրին արտադրությունը 2020 թվականի գարնանը՝ կորոնավիրուսի լոքդաունի պատճառով։ Սա խախտեց մատակարարման հաստատված շղթաները, քանի որ Ասիայում չիպերի մատակարարները պատրաստ չէին ավտոարտադրողների կողմից պահանջարկի՝ համեմատաբար արագ վերականգնմանը և չկարողացան հարմարեցնել իրենց արտադրական ծրագրերը:
