«Ոտքս գետին խփեմ, 200 հազար մարդ դուրս կգա փողոց», հայտարարել է Ազատության հրապարակում հանուն Արցախի փրկության 24-ժամյա ակցիա իրականացնող ԱԱԾ պետ Արթուր Վանեցյանը: Մի կողմ թողնենք այն, թե այդ արտահայտությունն ինչպես է լավագույնս բնորոշում խորհրդարանական ընդդիմության առաջնորդների և նրանց ընտրազանգվածի հարաբերությունների վարչահրամայական բնույթը: Այստեղ նորություն կարծես չկա էլ: Վանեցյանի արտահայտությունն ուշադրության է արժանի թերևս այլ նրբերանգի բերումով: 200 թիվը բոլորովին պատահական թիվ չէ: Համոզվելու համար վերստին նայեք խորհրդարանի արտահերթ ընտրության արդյունքները: 200 հազարը՝ դեպի վերև փոքր շեղումով, Հայաստան դաշինքի կամ Ռոբերտ Քոչարյանի հավաքած ձայներն են: Հայաստան դաշինքը 2021 թվականի արտահերթ ընտրությանը ստացել է 269 հազար ձայն: Իհարկե այդ թիվն ավելի մոտ է 300 հազարին, քան 200-ին, սակայն տվյալ պարագայում հնչում է՝ 269 հազար ձայն: Ահա այդ «հնչյունաբանության» մեջ թերևս պետք է փնտրել «Պատիվ ունեմ» դաշինքի խորհրդարանական խմբակցության ղեկավար Արթուր Վանեցյանի հայտարարության «կոդը»՝ ոտքը գետնին խփելու և 200 հազար մարդ հավաքելու մասին:
Ինչպես արդեն դիտարկել էի, Ազատության հրապարակում նրա ակցիան պետք է գնահատել նաև ներընդդիմադիր հարաբերությունների տիրույթում: Դրա վկայություն է նաև այն մեղմ ասած զուսպ վերաբերմունքը, որ Վանեցյանի ակցիայի նկատմամբ ցուցաբերում է «200 հազար» ձայնի տեր Ռոբերտ Քոչարյանի Հայաստան դաշինքը, որի համար Արթուր Վանեցյանի ակցիան իսկապես մարտահրավեր է: Եթե այսպես ասած սառը հաշվարկի ենթարկենք ակցիան իր դրսևորումներով և գոնե նախնական ազդեցությամբ, ապա այն ոչ միայն չի թուլացրել Փաշինյանի քաղաքական դիրքը, այլ հակառակը՝ ինչպես նախկին իշխանություն ընդդիմության յուրաքանչյուր ակտիվ գործողություն, բերում է Փաշինյանի դիրքի շուրջ հասարակական ամրությունների ակտիվության: Որքան կշարունակվի այդ «բանաձևի» կենսունակությունը, սա այլ հարց է, բայց առայժմ «բանաձևն» աշխատում է և բավականին նկատելի է նաև, թե ինչպես է հենց ինքը Փաշինյանը պարբերաբար խթանում այն: Փոխարենը, Արթուր Վանեցյանի ակցիան փաստի առաջ է դրել Ռոբերտ Քոչարյանին, որը հավակնում է լինել ընդդիմադիր դաշտի և մասնավորապես նախկին կառավարող համակարգի առաջին ջութակը:
Մյուս կողմից իհարկե, Արթուր Վանեցյանը «բարձրացրել» է ոտքը, բայց այն ի վերջո պետք է դնել գետնին՝ խփելով, թե այլ կերպ, որոշողն իհարկե ինքն է, բայց «բարձրացրած ոտքը» չի կարող անվերջ մնալ օդում, և այս դեպքում էլ թերևս դրան է սպասում Ռոբերտ Քոչարյանը:
Լուսանկարը՝ panorama.am-ի
