Հայաստանի պաշտպանության նախարար Սուրեն Պապիկյանն ապրիլի 13-ին ընդունել է Հայաստանում Հնդկաստանի դեսպան Կիշան Դան Դևալին: Հանդիպման թեման եղել է պաշտպանական ոլորտում հայ-հնդկական հարաբերությունն ու դրա հեռանկարը: Ինչպես նշվում է պաշտպանության նախարարության հաղորդագրության տեքստում, «կողմերը շեշտադրել են ռազմաքաղաքական խորհրդատվությունների, բարձր մակարդակով փոխայցելությունների, ինչպես նաև Հայաստանի և Հնդկաստանի պաշտպանության նախարարությունների միջև ռազմական համագործակցության մասին համաձայնագրի ստորագրման կարևորությունը»:
Հնդկաստանը ժամանակակից աշխարհաքաղաքական գործընթացների, աշխարհակարգային վերափոխումների առանցքային սուբյեկտներից մեկն է, որը շոշափելի դեր է խաղում եվրասիական անվտանգության համակարգում, ընդ որում այդ դերակատարման աճման միտումով: Հնդկաստանի դերակատարումն այդ առումով էական հավասարակշռող գործոններից է թե մեծ մերձավորարևելյան, թե այդ ռեգիոնի «ավազանում» ընդգրկված Կովկասի համար: Ավելին, ընդամենն օրեր առաջ առիթ ունեցա անդրադառնալ ամերիկա-հնդկական ծավալուն բանակցությանը, որ վարվել էր 2+2 ձևաչափով՝ Վաշինգոտոնում, ԱՄն ու Հնդկաստանի արտաքին գործերի ու պաշտպանության նախարարների միջև, և բարձր մակարդակում՝ Բայդեն-Մոդի տեսակոնֆերանսի ձևաչափով: Ներկայումս ուկրաինական «էպիկենտրոնային» գոտում տեղի ունեցողի համատեքստում ԱՄՆ փորձում է Հնդկաստանին բերել եվրաատլանտյան քաղաքականության համախոհության ու վարքագծի դաշտ, ինչը էական նշանակություն է ունենալու Ռուսաստանի հանդեպ ճնշման քաղաքականության տեսանկյունից:
Մյուս կողմից սակայն, Հնդկաստանի այդօրինակ «բեկումը» կարող է էապես խախտել մի բալանս, որն էական գործոններից է կովկասյան-մերձավորարևելյան անվտանգության համակարգի վրա ազդեցության տեսանկյունից: Այդ իմաստով, Հայաստանի համար հույժ կարևոր է Հնդկաստանի բալանսավորված քաղաքականությունը ԱՄՆ և Ռուսաստանի միջև: Միևնույն ժամանակ սակայն, Երևանն անշուշտ չի կարող այստեղ ունենալ «բալանսը պահելու» հարցում որևէ ազդեցություն կամ դերակատարում, սակայն սրան զուգահեռ իհարկե նվազագույնը պարտավորել է «պահել» գործընթացնների զարկերակը, դրանց որևէ ընթացքի հանդեպ դիմակայունության որոշակի պաշար ձևավորելու համար: Այդ իմաստով հատկանշական է, որ Հայաստանի պաշտպանության նախարարությունում նախարարի և Հնդկաստանի դեսպանի հանդիպումը հաջորդում է ամերիկա-հնդկական լայնաֆորմատ և բարձր մակարդակի բանակցությանը: Միաժամանակ շատ կարևոր է հայ-հնդկական պաշտպանական գործակցության առավելագույն առարկայացումը և այդ իմաստով, նախարար Պապիկյանի և դեսպանի հանդիպմանն արծարծված հեռանկարը թերևս պետք է առարկայացվեն պատշաճ դինամիկայով, մասնավորապես ռազմական գործակցության համաձայնագրի ստորագրման հարցում: Հայաստանն ու Հնդկաստանն այդ իմաստով լինելով իհարկե աշխարհաքաղաքական առումով միանգամայն տարբեր և անհամեմատելի տրամաչափի սուբյեկտներ, այդուհանդերձ ունեն որոշակի ընդհանուր որակի հետաքրքրություն՝ բալանսավորված միջազգային վարքագծի և խաղի առումով, և այդ տեսանկյունից թերևս պետք է առավելագույնն անել համատեղ այդ որակը ոլորտային փոխհարաբերությամբ կապիտալիզացնելու համար:
