Իսպանական Sport պարբերականի փոխանցմամբ՝ Մադրիդի «Ռեալ»-ը սահմանել է իր բրազիլացի կիսապաշտպան Կակայից բաժանվելու գինը, ով մինչև ամառվա վերջ կարող է լքել «արքայական» ակումբը։ «Ռեալ»-ը պատրաստ է Կակային բաց թողնել 35 միլիոն եվրոյի դիմաց։ «Ռեալ»-ի պորտուգալացի գլխավոր մարզիչ Ժոզե Մոուրինյոն Կակային չի դիտարկում որպես մեկնարկային կազմի խաղացող։
Ներկա դրությամբ Կակային ձեռք բերելու գլխավոր հավակնորդը Միլանի «Ինտեր»-ն է, սակայն դա միակ տարբերակը չէ։ Բացի «Ինտեր»-ից, Կակային ձեռք բերելուն հավակնում են նաև իտալական «Միլան»-ը, ֆրանսիական «ՊՍԺ»-ն, բրազիլական «Սան Պաուլու»-ն և անգլիական «Արսենալ»-ը։
Օգոստոսի 22-ին Marca թերթը գրել էր, որ եթե «Ինտեր»-ի կամերունցի հարձակվող Սամուել Էտո’ոն տեղափոխվի Մախաչկալայի «Անժի» (ինչը կարող է տեղի ունենալ առաջիկա օրերին), ապա իտալական ակումբը պատրաստ է այդ գործարքից ստացված գումարները հատկացնել Կակայի ձեռքբերմանը։
Հիշեցնենք, որ Կական Մադրիդի «Ռեալ» է տեղափոխվել 2009 թվականի ամռանը՝ իտալական «Միլան»-ին վճարելով 67 միլիոն եվրո։ «Ռեալ»-ում անցկացրած երկու տարում Կական մասնակցել է ընդամենը 39 հանդիպման և խփել 15 գոլ։ Հանդիպումների նման սակավությունը պայմանավորված է Կակայի ստացած բազմաթիվ վնասվածքներով։