«Մենք` Լոս Անջելեսի հայությունը, պահանջում ենք ԱՄՆ Պետդեպարտամենտից, որպեսզի Հայաստանի գործող նախագահ Սերժ Սարգսյանին զրկեն ԱՄՆ մուտքի իրավունքից: Օրերս իմացանք, որ գործող նախագահը գալու է Լոս Անջելես՝ մասնակցելու հյուպատոսարանի նոր շենքի բացման արարողությանը, և արդեն 3-4 օր կազմակերպել ենք ստորագրահավաք` մի քանի օրվա ընթացքում հավաքելով 10-15000 ստորագրություն»,- «Առաջին լրատվական»-ի հետ զրույցում ասաց նախաձեռնության հեղինակ, Լոս Անջելեսի AMGA հեռուստաընկերության «Վարագույր» հեռուստաժամի մեկնաբան Ռուդիկ Հովսեփյանը:
«Մարդիկ խմբերով են մասնակցում նախաձեռնությանը, որովհետև հասկանում են և դեմ են գործող օլիգարխիկ և տոտալիտար իշխանությանը: Եթե Ռուսաստանի, եթե մյուս երկրների տոտալիտար քաղաքական գործիչներին թույլ չեն տալիս Միացյալ Նահանգներ մտնել, ինչի՞ եք թույլ տալիս Հայաստանի տոտալիտար, հանցագործ նախագահին մտնել Միացյալ Նահանգներ: Լոս Անջելեսի հայությունը չի ուզում հայերին և Հայաստանն այդպիսին տեսնել: Այստեղ հայությունը շատ լավատեղյակ է հայաստանյան քաղաքականությանը և ակտիվ մասնակցում է նման նախաձեռնություններին»,- ասաց Ռ. Հովսեփյանը:
«Ի դեպ, սա առաջին ստորագրահավաքը չէ: Երբ 2008 թվականին Սերժ Սարգսյանն ընտրվեց նախագահ, մենք էլի կազմակերպել էինք նմանատիպ պահանջով նախաձեռնություն: Մենք ասում ենք ո՛չ ավազակապետական ռեժիմին: Մենք կուղարկենք պահանջը, իսկ Պետդեպարտամենտը մեզ պարտավոր է գրավոր պատասխան տալ, թե քանի օրվա ընթացքում կպատասխանեն՝ ես չգիտեմ»,- Լոս Անջելեսից «Առաջին լրատվական»-ի հետ զրույցում ասաց Ռուդիկ Հովսեփյանը:
