Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին, երեկ Անակլիայի՝ պաշտոնապես առողջարանային քաղաքի կարգավիճակ ստանալու արարողության ժամանակ, պատասխանել է լրագրողների հարցերին՝ հայտարարելով, որ Վրաստանն այնքան է շտապում զարգանալու հարցում, որ իրավունք չունի կորցնել գեթ մեկ րոպե.
«Այսօր բացվում է Անակլիան, այս պահին այստեղ ընթանում են վերջին աշխատանքները։ Անակլիայում առողջարան կառուցելու գաղափարն ինձ մոտ ծագեց հետևյալ կերպ. մի անգամ ես առափնյա պահպանության մոտորանավակով դուրս եկա բաց ծով, սակայն այն փչացավ, և մենք որոշեցինք կանգ առնել Անակլիայում՝ հյուրընկալվելով տեղի ընտանիքներից մեկում։
Այն ժամանակ այստեղ գործում էր ռուս խաղաղապահների կենտրոնը։ Նկատելով մեզ՝ նրանք դուրս բերեցին տանկերն ու մեզ վրա ուղղեցին ինքնաձիգները։ Անգամ ռազմական միջադեպ գրանցվեց։
Երբ ես զրուցեցի տեղաբնակների հետ, հասկացա, թե ինչպիսի պոտենցիալ ունի տեղանքը։ Երբ ողջ Վրաստանում անձրևում է, այս վայրը բացառություն է կազմում։ Այստեղ կլիման լավն է և հարմարավետ»։
Հիշեցնենք, որ վրացական կողմը Սև ծովի ափին ընկած Անակլիայում կառուցել է հետիոտների համար նախատեսված՝ Եվրոպայի ամենաերկար կամուրջը, որն ունի 540 մետր երկարություն։
