Կառավարությունն այսօրվա նիստում որոշեց կառավարության պահուստային ֆոնդից ԿԳՄՍ նախարարությանը հատկացնել 67 մլն 125.1 հազար դրամ: Նախատեսվում է 60 մլն դրամ գումարը հատկացնել ՀՀ քաղաքաշինության կոմիտեին՝ Կապան խոշորացված համայնքի գյուղական բնակավայրերից ընտրված 13 բնակավայրի դպրոցների շենքային պայմանների բարելավման նախագծանախահաշվային փաստաթղթերի մշակման և փորձաքննության ծառայությունների ձեռքբերման համար:
Ըստ ԿԳՄՍ նախարար Վահան Դումանյանի՝ կկատարվեն կրթահամալիրների վերակառուցման աշխատանքներ, իսկ Ներքին Հանդ և Շիկահող գյուղերում կկառուցվեն կրթահամալիրներ։ Այս 13 բնակավայրերում նախատեսվում է ունենալ արդիական շենքային ու գույքային պայմաններ՝ համապատասխան լաբորատորիաներով, մարզադահլիճներով, որտեղ կկազմակերպվեն նախադպրոցական, դպրոցական, ինչպես նաև լրացուցիչ կրթական ծրագրեր։
«Ինչ վերաբերում է Սյունիքի կրթական միջավայրի կազմակերպմանը, մենք արդեն անցնում ենք նախագծման փուլին, և այս միջոցները տրամադրվում են նախագծման համար։ Սա բացարձակ առաջնահերթություն է՝ կրթության ոլորտում մեր ծրագրերի իրականացումը։ Հարցը կրթության հասանելիության մասին է, ամենատարբեր ժամանակներում տարբեր լուծումներ են առաջարկվել։ Բայց մենք կարծում ենք, որ գտել ենք մի մոդել, որով իսկապես կարողանալու ենք կրթության հասանելիությունը նույնիսկ ամենահեռավոր բնակավայրերում ապահովել»,- ասաց վարչապետ Նիկոլ Փաշինյանը։ Ըստ նրա՝ զուգահեռ շատ կարևոր է Սյունիքում նաև ենթակառուցվածքային ծրագրերի իրականացումը, և ճանապարհաշինական լայնածավալ ծրագրեր են իրականացվում այնտեղ։
