Արդարադատության նախարար Հրայր Թովմասյանի՝ 2011 թ. օգոստոսի 5-ի հրամանով ՀՀ ԱՆ «Հրազդան» ՔԿՀ-ի պետ, արդ. գնդապետ Արամ Սարգսյանը նշանակվեց «Աբովյան» ՔԿՀ-ի պետ, «Նուբարաշեն» ՔԿՀ-ի պետ, արդ. գնդապետ Տիգրան Նավասարդյանը նշանակվեց «Հրազդան» ՔԿՀ-ի պետ, «Արմավիր» ՔԿՀ-ի պետ է նշանակվել արդ. գնդապետ Լյովա Սարուխանյանը, «Կոշ» ՔԿՀ-ի պետ, արդ. փոխգնդապետ Լյովա Բաղդասարյանը նշանակվել է «Էրեբունի» ՔԿՀ-ի պետ:
Այլընտրանքային պատիժների կատարման բաժնի պետ, արդ. գնդապետ Գենադի Սարգսյանը նշանակվեց «Նուբարաշեն» ՔԿՀ-ի պետ, իսկ «Կոշ» ՔԿՀ-ի պետ՝ արդ. գնդապետ Ավետիս Ստեփանյանը:
«Առաջին լրատվական»-ը Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցից փորձեց ճշտել, թե ՔԿՀ-ների պետերի «փոխատեղումներն» ի՞նչ փոփոխություններ կարող են բերել հիմնարկներին, ու որքանո՞վ են արդյունավետ դրանք:
«Ոչ մի փոփոխություն էլ չեն կարող բերել: Ինձ համար էլ՝ որպես քաղաքացի, անհասկանալի է, թե ինչ հիմնավորմամբ են կատարվում պետերի փոփոխությունները: Դա կարող է անձնական, ֆորմալ լինի, կարող է և այնպես լինել, որ պետերը պետք է տեղափոխվեն: Բայց թե տվյալ դեպքում որ հիմնարկ ինչու են տեղափոխել՝ հայտնի չէ»,- նշեց Սաքունցը՝ ցանկություն հայտնելով, որ գոնե նրանց կենսագրությունները տպագրեին:
Նրա խոսքով՝ «Նուբարաշեն» քրեակատարողական հիմնարկը բավական մեծ ու խնդիրներ ունեցող հիմնարկ է, և նախարարը պետք է անձամբ հիմնավորի իր նշանակումը: «Բայց, ընդհանուր առմամբ, այդ տեղափոխությունները փոքր-մոքր բաներ են: Խնդիրը համակարգում էական նշանակություն ունենալ չի կարող»,- ասաց Ա. Սաքունցը՝ հավելելով, որ լսել է, թե նախարարը քավոր-սանիկի հարաբերություններ ունի «Նուբարաշեն» ՔՀԿ-ի պետի հետ:
