Թուրքական Cumhuriyet թերթի փոխանցմամբ՝ այսօր Թուրքիայում փորձնական կարգով մեկնարկում է ինտերնետի ֆիլտրման գործընթացը։ Այդ փորձաշրջանը տևելու է 3 ամիս և 2011 թվականի նոյեմբերի 22-ից սկսած՝ պաշտոնապես մտնելու է ուժի մեջ։ Այդ ընթացքում ստուգվելու է թուրքական հասարակական կարծիքի արձագանքը։
Հիշեցնենք, որ ավելի վաղ նշվում էր, որ «Ինտերնետից օգտվելու անվտանգ սկզբունքներ ու կարգեր» անվանված կանոնների համաձայն` ինտերնետից օգտվող թուրքերը ստիպված կլինեն ընտրություն կատարել վեբ կայքերի ֆիլտրման 4 տարբերակներից («ընտանիք», «երեխա», «տնային» (երկրի ներսում), «ստանդարտ») որևէ մեկի օգտին:
Թուրքիայի հաղորդակցության ու տեղեկատվական տեխնոլոգիաների վարչությունը սահմանելու է այն չափանիշները, որոնց համապատասխան պետք է ֆիլտրման ենթարկվեն վեբ կայքերը: Օրինագծի համաձայն` ֆիլտրման կենթարկվեն այն կայքերը, որոնցում առկա են «աղջիկ», «գործընկեր», «կենդանի» բառերը: Ֆիլտրման չենթարկված կայքեր մուտք գործելու փորձերը կհավասարեցվեն իրավախախտման և կպատժվեն խոշոր տուգանքով: Ակնկալվում է, որ բազմաթիվ վեբ կայքեր կարգելափակվեն` անկախ դրանց բովանդակությունից:
Թուրքական հասարակությունը օգոստոսի 22-ը արդեն իսկ կնքել է որպես Թուրքիայում «ինտերնետի մահվան» օր: Ի դեպ, նմանատիպ սահմանափակումներ գործում են Չինաստանում, Իրանում, Կուբայում, որոնք ողջ աշխարհում հայտնի են իրենց ինտերնետային գրաքննությամբ: