Գերատեսչության պաշտոնական ներկայացուցիչ Սաիդ Խատիբզադեի խոսքով՝ «խաղաղ ատոմի շուրջ Իրանի համագործակցությունը Ռուսաստանի և Չինաստանի հետ չպետք է ենթարկվի որևէ սահմանափակման»։ Ռուսաստանը կառուցողական ներդրում ունի Իրանի դեմ պատժամիջոցների չեղարկման գործընթացում. Այս մասին երկուշաբթի օրը ասուլիսում ասել է Իրանի ԱԳՆ մամուլի խոսնակ Խատիբզադեն։
«Վիեննայում համաձայնության հասնելու՝ Ռուսաստանի մոտեցումը մինչ այժմ կառուցողական է եղել», – ասել է նա։ Նրա խոսքով՝ «խաղաղ ատոմի շուրջ Ռուսաստանի և Չինաստանի հետ Իրանի համագործակցությունը չպետք է ենթարկվի որևէ պատժամիջոցի ու սահմանափակման»։
Փետրվարի 8-ին Վիեննայում, ընդմիջումից հետո, վերսկսվեց բանակցությունների ութերորդ փուլը՝ նպատակ ունենալով վերականգնել միջուկային գործարքն՝ իր սկզբնական տեսքով, և ԱՄՆ-ին վերադարձնել այս բազմակողմ համաձայնագրին։ Աշխատանքներն իրականացվում են ինչպես Իրանի, Ռուսաստանի, Մեծ Բրիտանիայի, Գերմանիայի, Չինաստանի և Ֆրանսիայի համատեղ հանձնաժողովի շրջանակներում, այնպես էլ՝ ԱՄՆ-ի հետ առանձին խորհրդակցությունների ձևաչափով, առանց Թեհրանի մասնակցության, որը դեռևս պատրաստ չէ ամերիկյան կողմի հետ ուղիղ երկխոսությանը։ Բանակցողներն արդեն պայմանավորվել են արագացնել համաձայնագրի նախագծի վրա աշխատելու գործընթացը։ Ենթադրվում է, որ ութերորդ տուրը կարող է վերջինը լինել։
