ՀՀ ազգային ժողովի արտաքին հարաբերությունների մշտական հանձնաժողովը չի հաստատել «Հայաստան» խմբակցության ներկայացրած՝ Ադրբեջանի եւ Թուրքիայի խորհրդարանների կողմից «Շուշիի հռչակագրի» վավերացման կապակցությամբ հայտարարության նախագիծը:
«Հայաստան» խմբակցությունն առաջարկում է արձագանքել այդ հռչակագրին, իսկ «Քաղաքացիական պայմանագիր» խմբակցությունը չի տեսնում դրա անհրաժեշտությունը՝ նշելով, որ Արտաքին գործերի նախարարությունն արդեն իսկ երկու անգամ հայտարարություն է տարածել այդ հռչակագրի հետ կապված և դա իշխանության արտաքին քաղաքականության միասնական դիրքորոշումն է:
«Աննա Գրիգորյանը («Հայաստան» խմբակցության պատգամավոր- խմբ.) «Քաղաքացիական պայմանագիր» խմբացության դիրքորոշումից հետևություն է անում, թե մենք կողմ ենք «Շուշիի հռչակագրին», կողմ ենք բոլոր մնացած այն կետերին, որոնք հռչակագրում նեռարված են: Երբ խոսում ենք Հայաստանի Հանրապետության իշխանությունների կողմից վարած արտաքին միասնական քաղաքականության մասին,մենք նկատի ունենք, որ հայտարարությունների կրկնությունը չի արտահայտում միասնական քաղաքականություն: Մենք արձանագրում ենք, որ Հայաստանի Հանարապետության արտաքին գործերի նախարարությունը հունիսի 15-ին և հունիսի 17-ին արձագանքել է նշված հռչակագրին: Եվ Հայաստանի Հանրապետության լիազորությունների շրջանակներում է որոշում կայացնել, թե որ պահին, տարբեր մարտավարական նկատառումներից ելնելով և գնահատելով տվյալ պահին բխող բոլոր ռիսկերը և հնարավորությունները, այս կամ այն հայտարարություններ անել կամ չանել, հայտարարություն անել Ազգային ժողովի կողմից կամ որևէ այլ ձևաչափով: Դա Հայաստանի Հանրապետության որոշումն է: Սա մեկնաբանել որպես այս հռչակագրին կողմ լինել, կարծում եմ, առնվազն մանիպուլյացիայի դաշտից է»,- ընդգծեց Արտաքին հարաբերությունների հանձնաժողովի նախագահ, «Քաղաքացիական պայմանագիր» խմբակցության պատգամավոր Էդուարդ Աղաջանյանը:
Աղաջանյանը նշեց, որ Հայաստանի Հանրապետության արտաքին գործերի նախարարության հայտարարությունը մեծապես համընկնում է այն տեքստի հետ և այն կետերի հետ, որոնք առաջարկվող նախագծում առկա են:
Արձագանքելով Էդուարդ Աղաջանյանին` նախագծի հեղինակ, «Հայաստան» խմբակցության պատգամավոր Անդրանիկ Թևանյանը նշեց, որ հատուկ հատվածներ է վերցրել Արտաքին գործերի նախարարության հայտարարությունից, որպեսզի ցույց տան քաղաքականության շարունակականությունը:
«Գործադիրի մակարդակով արված հայտարարությանը պետք է հաջորդի խորհրդարանի մակարդակով հայտարարությունը, որովհետև թշնամական երկրներում խորհրդարանի մակարդակով են արվել»,- ասաց Թևանյանը:
Նախագիծը դրվեց քվեարկության, որի կողմ քվեարկեցին ընդդիմադիր «Հայաստան» և «Պատիվ ունեմ» խմբակցությունները, իսկ «Քաղաքացիական պայմանագիր» խմբակցությունը ձեռնպահ քվեարկեց: