«Առաջին լրատվական»-ի զրուցակիցն է ուկրաինական քաղաքական վերլուծաբան Մարատ Հակոբյանը
–Պարոն Հակոբյան, ռուս–ուկրաինական լարման ֆոնին Դոնբասից Ռուսաստան է անցել 10 հազար 356 մարդ: Դոնեցկի բնակչությունը տարհանվում է։ Ինչպե՞ս եք գնահատում իրավիճակը։
-Ակնհայտ է, որ Մոսկվան մոլորվել է արտաքին քաղաքական անհաջողություններից: Վերջին ամիսներին բացի իր նկատմամբ բացասական ուշադրություն գրավելուց և պատժամիջոցներից Կրեմլը ոչնչի չի հասել: Դոնբասի տարածքից տեղի բնակիչների, այսպես կոչված, տարհանումը ցույց է տալիս ռուսական իշխանությունների ցավոտ տատանումները: Հատկապես Մոսկվայում ծանր են տանում, որ ռազմական շանտաժն արդյունք չի տալիս, քանի որ հենց այդ ոլորտն էին նրանք համարում հիմնական հաղթաթուղթը: Պուտինի ռեժիմը անկյուն է քշվել, և դարձել է ավելի վտանգավոր ու անկանխատեսելի բոլոր նրանց համար, ում նա համարում է հակառակորդ:
–Հայ համայնքը ի՞նչ է ակնկալում Հայաստանից, ինչ քայլեր պետք է ձեռնարկի Հայաստանը, արդյոք այդ տարածաշրջանից դեպի Հայաստան հայերի հոսք կլինի:
-Մենք շատ լավ հասկանում ենք, թե ինչ իրավիճակում է Հայաստանը և այս պահին պաշտոնական Երևանի լավագույն որոշումը կլինի կենտրոնանալ միջազգային իրավունքին հետևելու վրա: Ինչ վերաբերում է համայնքի ակնկալիքներին, պետք է հաշվի առնել, որ Սփյուռքի ներկայացուցիչները ճնշող մեծամասնությամբ Ուկրաինայի քաղաքացիներ են, ես կասեի՝ շատ ակտիվ քաղաքացիներ, որոնք ներգրավված են հասարակական ու քաղաքական կյանքի բոլոր ոլորտներում: Բնականաբար, բոլորը ցանկանում են խաղաղություն ինչպես Ուկրաինայում, այնպես էլ իրենց պատմական հայրենիքում: Նշեմ, որ Ուկրաինայում Հայաստանի դեսպանությունը մշտական կապի մեջ է Ուկրաինայի հայերի միության հետ, դեռևս որևէ ֆորսմաժորային իրավիճակ չի առաջացել, հույս ունենք, որ չի էլ առաջանա:
–Հնարավոր պատերազմի դեպքում որքանո՞վ կհաջողվի Հայաստանին չեզոքություն պահպանել։ Ընդհանրապես, ի՞նչ դիրքորոշում պետք է որդեգրի Հայաստանը:
-Դեռևս պաշտոնական Երևանը իրեն պահում է բավական չեզոք և զուսպ: Հայաստանը քիչ բանով կարող է օգնել հակամարտող կողմերին, այս պահին խիստ կարևոր է օբյեկտիվ գնահատականը տեղի ունեցողին: Հայաստանում կան բավարար թվով կոմպետենտ կադրեր, որոնք իրավիճակի ամբողջական վերլուծություն կարող են անել և թույլ չտալ երկիրը ներքաշել Կրեմլի արկածախնդրության մեջ: Նաև շատ կարևոր է իրավիճակի անաչառ լուսաբանումը լրատվամիջոցներում:
–Որքանո՞վ է հավանական, որ այնուամենայնիվ, դիվանագիտությունը կհաղթի և հնարավոր կլինի խուսափել պատերազմից:
-Միջազգային խաղացողներն անում են ամեն ինչ, որ հեռացնեն էսկալացիայի սպառնալիքը: Միաժամանակ Ուկրաինայի իշխանությունները ակտիվորեն պաշտպանում են ինչպես իրենց քաղաքացիների կյանքը, այնպես էլ երկրի ինքնիշխանությունը: Մենք տեսնում ենք, որ փաստացի ամբողջ Արևմուտքը ներգրավված է ակտիվ դիվանագիտության մեջ: Եթե նկատել եք, անընդհատ այցելությամբ Ուկրաինայում են գտնվում տարբեր երկրների ղեկավարներ կամ բարձրաստիճան պաշտոնյաներ, որոնք աջակցում են պաշտոնական Կիևին: Ինտերնսիվ աշխատանք է տարվում:
