Այս ամսից, ինչպես գիտենք, թանկացավ էլեկտրաէներգիայի սակագինը 5.5 դրամով, որն առանձնակի անհանգստություն առաջացրեց նաև ջերմոցային տնտեսվարողների շրջանում: Դա պայմանավորված է նրանով,որ ջերմոցները որոշ սեզոնների ոռոգվում են խմելու ջրով: Ոլորտի մասնագետների և տնտեսվարողների պնդմամբ,սակայն,ջերմոցների համար մեծագույն հարված կարող է լինել, եթե ապրիլի 1-ից բարձրանա նաև գազի սակագինը,որն ամենայն հավանականությամբ անխուսափելի է,քանի որ ռուսական «Գազպրոմ Արմենիան» դիմել է կարգավարող հանձնաժողով կապույտ վառելիքի միասնական՝ 135.6 դրամ սակագին սահմանելու հայտով։ Նշենք, որ դեռևս Կարեն Կարապետյանի կառավարության ժամանակ ջերմոցային տնտեսություններն օժտված էին արտոնությամբ,այն է՝ տարվա ցուրտ ամիսներին՝ապրիլից նոյեմբեր, սովորական սպառողներից պակաս էին վճարում մեկ խորանարդ մետրի համար շուրջ 30 դրամով:
«Ջերմոցների ասոցացիայի» ղեկավար Պողոս Գևորգյանը կարծում է, որ այս շղթայական թանկացման հետևանքները ջերմոցային տնտեսության համար կործանարար է լինելու: «Առանց այն էլ քիչ եկամտաբեր ոլորտը լիովին կորցնելու է շահավետությունը: Տնտեսվարողները պարզապես կսկսեն վերացնել»,-ընդգծում է նա։ Վերջինս մեզ փոխանցեց, որ իրենց ասոցացիայի տեղեկություններով՝ արդեն իսկ նորաբաց 4-5 ջերմոցատերեր հրաժարվել են այս տարի մշակելուց՝ չկարողանալով այդքան շատ հարկային բեռի տակ մտնել: «Ի՞նչ հույսով վերցնենք վարկերը, եթե կառավարությունը ոչ մի հստակ խոստում չի տալիս, ոչ մի սուբսիդիոն ծրագիր չի առաջարկում,միայն խոսել է,որ բանակցություններ է վարում՝թանկացումը կանխելու համար»,-վրդովված հավելեց մեր զրուցակիցը:
Նրա խոսքով՝ եթե ոչինչ չարվի, ապա ներկայումս մշակվող շուրջ 170000 հա ջերմոցները կկանգնեն ոչնչացման վտանգի առաջ, իսկ տնտեսությունների վարման մեջ ներգրավված շուրջ 11000 մարդկանց մեծ մասը սկսելու է հրաժարվել ջերմոց մշակելուց, մնալու է անգործ,անորոշության մեջ: «Պատկերացնում եք՝ ինչ վտանգավոր իրավիճակ կստեղծվի: Ամենայն հավանականությամբ, ջերմոցային տնտեսություն ունեցող մարդկանց մի մասը կգնա այլ երկիր՝ աշխատելու և ապրուստ վաստակելու»,-ասում է Պողոսյանը։
Վերջինիս փոխանցմամբ՝ իրենց ասոցացիան բավականին շատ ջերմոցային տնտեսությունների մասնակցությամբ ժողով են նախատեսել, որի ընթացքում քննարկելու են ու որոշեն, թե թանկացումների դեմ ինչ պահանջներ,առաջարկներ ներկայացնեն կառավարությանը՝ ոլորտը փրկելու համար հրատապ քայլեր ձեռնարկելուն ուղղված։ Այդ պահանջներն ու բողոքը, թեև կհստակեցվեն ժողովի ընթացքում, սակայն նա ցանկացավ նշել, որ պետությունից պահանջելու են առաջին հերթին կանխել գազի թանկացումը, իսկ եթե դա անհնար է, գոնե ջերմոցային տնտեսվարողների համար արտոնյալ սակագներ սահմանվի, երկրորդը՝ Թուրքիայից ներկրվող ապրանքների մաքսատուրքը բարձրացվի, որ հայկական ապրանքը չկորցնի իսպառ իր մրցունակությունը։
Իր համոզմունքը բացատրում է նրանով, որ Հայաստանում աճող գյուղմթերքի էական թանկացումն անխուսափելի է, քանի որ նրա ինքնարժեքի գոյացման 50-70 տոկոսը կազմում է գազն ու մյուս էներգակիրները, դրան գումարած թանկացել է ջուրը, որով ջերմոցները ոռոգվում են, իսկ թուրքական բանջարեղենը ստացվում է բնական եղանակով և անհամեմատ էժան է: Ըստ Պողոսյանի՝ դժվար չէ պատկերացնել՝ քանի անգամ կթանկանա գյուղմթերքի ինքնարժեքը և ինչ անմխիթար պատկեր կստեղծվի։ «Եթե նախկինում արդեն իսկ ապրանքի գինը ցածր էր ու քիչ շահավետ, օրինակ՝ լինում է ժամանակ,որ վարունգի կիլոգրամն ընդամենը 20-30դրամ է վաճառում մշակողը, առաջանում է նաև իրացման խնդիր, ապա հիմա կարող է դառնալ անհաղթահարելի խնդիր, քանի որ Թուրքիայից դարձյալ մեծ քանակությամբ գյուղմթերք է ներկրվելու, իսկ եթե սահմանը բացվի, հայակական ապրանքն ընդհանրապես չի վաճառվի։ Կստացվի, որ մենք այժմվանից մեր հարևանների, թշնամի երկրների տնտեսության զարգացման համար հրաշալի պայմաններ ենք ստեղծում, քանի որ մեր շուկայում արդեն 100 տոկոսով կսկեն թուրքական բանջարեղեն գնել»,-եզրափակեց ասոցացիայի ղեկավարը։