Ադրբեջանական Salam News գործակալության փոխանցմամբ՝ Թուրքիայի Սելչուկի համալսարանի պրոֆեսոր Նեզիր Աքեշիլմենը հայտարարել է, որ տարածաշրջանի քաղաքական խնդիրների լուծման համար Թուրքիան ու Ադրբեջանը կարող են ֆինանսական օգնություն ցուցաբերել Հայաստանին։
Պրոֆեսորի կարծիքով՝ այդ օգնությունը կցուցաբերվի այն պարագայում, եթե Հայաստանը հրաժարվի Ադրբեջանի ու Թուրքիայի նկատմամբ տարածքային հավակնություններից։
«Հայաստանում կարող են ներդրվել տնտեսական մանր տարրեր, ինչից հետո ավելի հեշտ կլինի երկխոսության միջոցով քաղաքական հարցերի լուծումն ու արդար համագործակցություն սկսելը։ Այդ տնտեսական գործիքները կարող են բաղկացած լինել առաջարկների փաթեթից՝ սկսած տարածաշրջանային տնտեսական ինտեգրումից վերջացրած դրամաշնորհի տրամադրումով կամ տնտեսական օգնությամբ։
Դրա արդյունքում Հայաստանի բնակչության գերակշռող մասը «կարող է» տնտեսապես ու սոցիալապես ազատ լինել ռասայական և ազգայնական խմբերից։ Տարածաշրջանը կարիք ունի ոչ թե հակամարտության, այլ երկխոսության ու խաղաղության»,- ասել է Նեզիր Աքեշիլմենը։
