Հայաստանի և Ադրբեջանի միջև դեռևս սահմանազատման և սահմանագծման աշխատանքները չեն սկսվել, սակայն նշվում է, որ սահմանազատման գործընթացն իրականացվելու է 70-ականների քարտեզով, որը որևէ կերպ չի բխում հայկական կողմի շահերից։ Նշվում է՝ Տավուշում նոր ճանապարհներ կառուցելու աշխատանքներ են մեկնարկելու, որոնցից մեկը Ոսկեպար ուղղությունն է, ինչպես նաև գյուղի մոտով անցնող Հայաստան-Վրաստան միջպետական ճանապարհի հատվածն է։ Բացի այդ, Կիրանց գյուղից դեպի Ոսկեպար տանող ճանապարհի մի հատվածը ևս հայտնվում է սահմանին, մյուսը Ոսկեպար-Բաղանիս ճանապարհն է։
Քարտեզագետ Ռուբեն Գալիչյանն «Առաջին լրատվական»-ի հետ զրույցում վերահաստատեց՝ 70-ականների ՌԴ Գլխավոր շտաբի քարտեզներով սահմաններն այնպես են գծել, որ Հայաստանի տարածքից շուրջ 1500 քառակուսի կիլոմետր տրվել է Բաքվին և մեզ համար կարևոր է՝ 20-ականների քարտեզով սահմանազատում իրականացնելը։ Ճիշտ տարբերակը, ըստ նրա, 1920 թվականից մինչև 1926 թվականը եղած խորհրդային քարտեզներն են, որտեղ Հայաստանում ադրբեջանական անկլավներ չկան, Ալ լճերը ամբողջությամբ մերն են, Շուռնուխի շրջանի այն տարածքը, որ այսօր ճանապարհը Ադրբեջան է մտնում ու դուրս գալիս, դա ևս Հայաստանի տարածքում էր գտնվում։
«30-ականներին երկու անկլավային տարածք տրվեց Ադրբեջանին, որ խրվի Հայաստանի մեջ և մայրուղիներ դնի։ Դրանից հետո 70-ական թվականներին վավերացված քարտեզների մեջ անկլավային դատարկ տարածքները Ադրբեջանին անցան։ Դրանք դատարկ տարածքներ են, պարզապես դրված են նրա համար, որ Ադրբեջանը մեր մայրուղին հսկի, ուրիշ որևէ արդարացում չկա»,-ասաց Գալիչյանը՝ հավելելով, որ 70-ականների քարտեզներով Ադրբեջանին են անցնում երեք գյուղեր, որոնցից մեկն արևելք է, մյուս երկուսը Ոսկեպարի հատվածում է։ Կիրանց գյուղից դեպի Ոսկեպար տանող ճանապարհը սահմանին է հայտնվելու»,-հավելեց Գալիչյանը։
Այսպիսով, Գալիչյանի խոսքով՝ Ոսկեպարը հայկական կողմին է մնալու, իսկ նրա արևելքի և արևմուտքի երկու ադրբեջանական գյուղերը՝ Վերին Ասկիպարա և Վարին Ասկիպարա, որոնցից մեկը անկլավի մեջ է, նրանց է մնալու։ Նույն հայկական անունով են կոչել այդ գյուղերը, բայց Ոսկեպարը առանձին գյուղ է, ավելի մեծ տարածք է ներառում, հայկական շրջանում է գտնվում և Ոսկեպարն է, որ բաժանում է ադրբեջանական անկլավը Ադրբեջանի մայր սահմանից։
Քարտեզագետը մտահոգ է Ոսկեպարի մայրուղու ճակատագրով, ասում է, որ Ոսկեպարի մայրուղին երեք կտորով կհայտնվի նրանց հողի մեջ, այսպիսով, դեպի Վրաստան գնացող ճանապարհը կփակվի և Նոյեմբերյանից չես կարող գնալ հյուսիս, քանի որ հենց այդ հատվածում հատվում է ճանապարհը։
«Ինչպես Շուռւնուխի դեպքում, ինչպես Տաթևից Քաջարան գնացող ճանապարհը արեցին, նույնը պետք է արվի այս դեպքում։ Անկլավները եթե տրվելու են Ադրբեջանին, էլ ավելի մեծ խնդիրներ են առաջացնելու։ Հիշեցնեմ, որ անկլավները 30-ականների քարտեզների մեջ գոյություն չունեն, 32 թվականի քարտեզի մեջ Տավուշի երկու անկլավներ կան, իսկ 38-ին ավելացավ Տիգրանաշենը որպես անկլավ»,-ասաց Գալիչյանը։
