Ինչպես փոխանցում է The Tehran Times թերթը, երեկ Իրանի նախագահ Մահմուդ Ահմադինեժադը և Թուրքմենստանի նախագահ Գուրբանգուլի Բերդիմուխամեդովը ներկա են գտնվել Թուրքմենստանից Իրան հասնող երկրորդ գազամուղի բացմանը: Իրանի նավթի նախարարի տեղակալ Ջավադ Օուջին հայտարարել է, որ «գազամուղն ունի 500 կմ երկարություն, 1,2 մ տրամագիծ, և հնարավորություն ունի օրական մինչև 58 մլն խորանարդ մետր գազ տեղափոխել»:
Սա գազամուղի կառուցման երկրորդ փուլն է, առաջինն ավարտվել է այս տարվա հունվարին, հանձնվել է 1024 կմ խողովակաշար: Խողովակաշարով գազը թուրքմենական Դովլեթաբադ հանքավայրից կհասնի Իրանի Խանգիրան վերամշակման գործարան: Այս գազամուղը կկրկնապատկի գազի արտահանումը Թուրքմենստանից Իրան: Ծրագրի իրագործումը կողմերին արժեցել է $1,2 մլրդ: Օուջիի խոսքերով՝ այս գազամուղը հնարավորություն է տալիս թուրքմենական գազը Իրանի տարածքով հասցնել 5 երկրի` Թուրքիա, Իրաք, Պակիստան, Հայաստան և Ադրբեջան, ու ստեղծել գազային մեծ ցանց: Օուջին, որը նաև Իրանի ազգային գազային ընկերության նախագահն է, ասել է, որ Իրանը հիմա պատրաստ է թուրքմենական և ադրբեջանական գազի համար տարանցիկ երկիր դառնալ: Նա նշել է, որ Թուրքիայից և Իրաքից վերջերս ստացել է գազի տարանցման առաջարկներ: