Առաջին ատյանի դատարանը մասամբ բավարարել է Վարդենիսի ավագանու «Քաղաքացիական պայմանագիր» խմբակցության հայցն ու անվավեր է ճանաչել համայնքապետ ընտրելու ավագանու որոշումը։ Եթե մյուս կողմը դատարանի որոշումը չվիճարկի, ու այն մեկ ամսից ուժի մեջ մտնի, ավագանին քաղաքապետ ընտրելու նոր որոշում պետք է ընդունի։ Սակայն, ըստ ամենայնի, ավագանու «Ահարոն Խաչատրյան» և «Միասնական Վարդենիս» դաշինքները մտադիր են որոշումը վիճարկել Վերաքննիչ դատարանում։
Նշենք, որ դատարանը իր որոշման հիմքում դրել այն փաստը, որ «Քաղաքացիական պայմանագիր» կուսակցության ավագանու անդամները այդ նիստի մասին իրազեկված չեն եղել։
Այս առնչությամբ «Ահարոն Խաչատրյան» և «Միասնական Վարդենիս» դաշինքների փաստաբան Վարազդատ Հարությունյանը «Առաջին լրատվական»-ի հետ զրույցում նշեց, որ իրենք դատական ակտը անհիմն են համարում և չպատճառաբանված. «Դատական ակտը դեռ մեկ ամիս ժամանակ ունի ուժի մեջ մտնելու համար: Այսինքն այս պահին դա ուժի մեջ չէ, մենք էլ նախատեսում ենք վերաքննիչ բողոք տանել, այնպես չէ, որ մենք այդ դատական ակտը ընդունում ենք որպես ճշմարտություն:
Մենք նաև դատավորին ինքնաբացարկ հայտնելու միջնորդություն էինք ներկայացրել, որը մերժել էր դատարանը: Հիմքում դրել էինք այն հանգամանքը, որ այդ գործը տվյալ դատավորին ձեռքով մակագրվել է օրենքի խախտմամբ: Մենք մինչև վերջին պահը պնդել ենք, որ այս վեճը չի լուծում օրենքի վրա ստեղծված դատարանը: Այսինքն եթե հիմա անգամ դատական ակտի մեջ եղած մի շարք ապօրինություններին էլ չանդրադառնանք, միայն այն, որ այդ գործը քննվել է օրենքի կողմից չստեղծված դատարանի կողմից, դա արդեն դատական ակտի բեկանման հիմք է»,-ասաց նա:
Փաստաբանի խոսքով, դատարանի նախագահ Հրաչ Այվազյանը՝ խախտելով կարգը, այդ գործը մակագրել է մի դատավորի, որը չէր սպասարկում Գեղարքունիքի մարզը:
Նա հիշեցրեց, որ ՄԻՊ-ի արտահերթ զեկույց կա, որտեղ վերջինս կասկածի տակ է դնում ձեռքով մակագրումների օրինականությունը, որ դատարանի նախագահները խախտում են չափանիշների ու պատահականության սկզբունքները:
Հարցին, թե ինչի՞ է ձգտում «Քաղաքացիական պայմանագիրը», որն է նպատակը, որ դիմել է դատարան, Վարազդատ Հարությունյանը պատասխանեց. «ՔՊ-ի նպատակը նոր ընտրություններն են: Այսինքն իրենք սահմանամերձ Վարդենիս խոշորացված համայնքի բնականոն կյանքը իրենց գործողություններով պարալիզացրել են, ձևական առիթով դիմել են դատարան, բայց իրենց իրական նպատակն այն է, որ քանի որ այս անգամ ընտրության արդյունքն իրենց համար հարմար չեղավ, ուզում են նորից փորձել: Ասում են՝ մի անգամ էլ գնանք ընտրության:
Իրենք ասում են՝ տեղյակ չենք եղել, որ ավագանու նիստ է հրավիրվել, դրա համար մեր իրավունքը խախտվել է: Իրենք ասում են, որ խախտվել է իրենց՝ թեկնածու առաջադրելու և ընտրելու իրավունքը: Ասում են՝ չենք իմացել նիստի մասին, բայց մենք դատարանում հրապարակեցինք ապացույցը՝ տեսաաձայնագրությունը, որ ավագանուն նիստի ընթացքում, դեռևս առաջադրումներն էլ չեղած, ՔՊ-ական ավագանու անդամները գալիս մտնում են նիստերի դահլիճ, բայց հրաժարվում են մասնակցել նիստին, ինչը ոչ թե իրենց իրավունքն է, այլ պարտականությունը: Քաղաքական հայտարարություն են անում ու դուրս են գալիս նիստերի դահլիճից: Չնայած այդ ամենին, դատարանը բավարարել է ՔՊ-ի հայցը, հիմա սա քաղաքակա՞ն է, թե ոչ»,-ասաց նա:
Հիշեցնենք, որ դեկտեմբերի 30-ին ավագանու երեք դաշինքներից երկուսը՝ «Ահարոն Խաչատրյան» և «Միասնական Վարդենիս» դաշինքները համայնքապետ ընտրեցին Ահարոն Խաչատրյանին։ Միավորված դաշինքները 14 մանդատ ունեին, Իսկ «Քաղաքացիական պայմանագիր» կուսակցությունը՝ 13։ ՔՊ-ն, որի առաջին համարը Վարդենիսի նախկին ղեկավար Արամ Մելքոնյանն էր, ընտրությանը չմասնակցեց, և նոր ընտրություններ են պահանջում։
«Քաղաքացիական պայմանագիրն» ավագանու ընտրություններում ամենաշատ ձայնն էր ստացել՝ 6163, «Ահարոն Խաչատրյան» դաշինքը` 4989, «Միասնական Վարդենիսը»` 2205: Վերջին երկու ուժերի միավորվելու արդյունքում, «Քաղաքացիական պայմանագիրը» մեկ մանդատով զիջեց։
Իշխանական կուսակցության անդամները համարում են, որ այս ընտրությունն ապօրինի է, իրենց ընտրելու իրավունքը խախտվել է, քանի որ նիստի մասին իրազեկված չեն եղել։
Նշենք նաև, որ ոստիկանները թույլ չեն տվել Ահարոն Խաչատրյանին մտնել համայնքապետարանի շենք և ստանձնել պարտավորությունները: