Նախօրեին հայտնի է դարձել, որ Հայաստանի ու Թուրքիայի հատուկ բանագնացների երկրորդ հանդիպումը տեղի կունենա փետրվարի 24-ին՝ Վիեննայում: Այդ մասին հայտնել է Հայաստանի արտգործնախարարությունը: Հատկանշական է, որ հանդիպման մասին տեղեկությունն այս անգամ առաջինը հրապարակում է հայկական կողմը և դա տեղի է ունենում Ավստրիայի արտգործնախարարի Հայաստան կատարած այցից անմիջապես հետո:
Քաղաքագետ Լևոն Շիրինյանի դիտարկմամբ՝ դրական է, որ Ավստիրան ներգրավվածություն է ունենում տարածաշրջանային իրադարձություններում․ «Լրտեսական խաղերը չեմ կարող բացատրել, բայց կարող ենք հստակ արձանագրել, որ ամբողջ գործընթացը դուրս է եկել Ռուսաստանի վերահսկողությունից ու մասնակցությունից։ Եվ ընդհանրապես ռուսական վերահսկողությունից պետք է ամեն ինչ պետք է դուրս բերել՝ մանավանդ հայ-թուրքական հարաբերությունների կարգավորման գործընթացը»,-«Առաջին լրատվական»-ի հետ զրույցում ասաց նա։
Շիրինյանի դիտարկմամբ՝ Մոսկվայի վերահսկողությունը հայկական հարցերի նկատմամբ մեզ համար խիստ վտանգավոր է․ «Մոսկվան մշտապես հայկական հարցն ու շահերը աճուրդի է հանել։ Երբեք Ռուսաստանը ի նպաստ Հայաստանի քայլեր չի իրականացնելու կամ անելու է այնքան, ինչքան իրեն է պետք։ Դա մեզ համար մահվան ճանապարհ է և սա հստակ պետք է իմանան նույնիսկ ռուսական գործակալները։ Այո՛, այս օրերին նկատելի է ավստրիական կողմի աջակցությունը, բայց ուշադիր լինենք, թե ինչ ասաց արտգործնախարարը՝ որպեսզի օգնենք, Հայաստանը պետք է դիմի։ Այո՛, մենք պետք է լայնորեն բացվենք դեպի ԱՄՆ ու Եվրամիություն՝ չբացառելով մնացած ուղղությունները։ Բայց միևնույն ժամանակ Ռուսաստանի վերահսկողությունից պետք է ամեն ինչ դուրս բերենք։ Այս վիճակի փրկության միակ ճանապարհը հենց դա է, թող ոռնոց չդնեն, իսկ ովքեր ոռնոց են դնելու, ուրեմն ռուսական գաղտնի ծառայությունների գործակալ են»։
Միևնույն ժամանակ մեր զրուցակիցը ընդգծեց, որ հայ-ռուսական երկկողմ հարաբերությունները պետք է կարգավորվեն երկկողմ համաձայնագրերի տիրույթում, իսկ ՀԱՊԿ-ն ու այլ կառույցները պարզապես բլեֆ են․ «Մեկ այլ կարևոր հարց կա։ Այն մտայնությունը, թե Ավստրիան հայկական հարցի թշնամին է ՝ սխալ է, եթե դրանով շարունակենք ապրել, ապա հինգ տարի հետո մեր երկրից բան չի մնա։ Այժմ մենք պետք է նախկինում եղած հակառակորդների հետ ակտիվ երկխոսության գնանք՝ առանց միջնորդության։ Ռուսաստանը չպետք է վերահսկի մեր արտաքին քաղաքականությունը»,-եզրափակեց նա։
Քաղաքագետ Անդրիաս Ղուկասյանի կարծիքով՝ կարևոր է հասկանալ նաև թուրքական կողմի նպատակները, որոնք Անկարան դնում է իր առջև․«Հասկանալի է, որ Թուրքիայի համար կտրուկ փոխվել է իրավիճակը ԱՄՆ-ի կողմից հայերի ցեղասպանությունը ճանաչելուց հետո և Թուրքիան ձգտում է Հայաստանի հետ ա դուրս գալ ընդհանուր հայտարարի, որ հնարավորինս նվազեցվի Թուրքիայի հատուցումը հայերի ցեղասպանության հետ կապված։ Այն, ինչ գտնվում է հրապարակային տիրույթում, թույլ է տալիս ենթադրել, որ Թուրքիան պատրաստ է բացել կոմունիկացիաները, պատրաստ է պահպանել հայկական ազգային ժառանգությունը Թուրքիայի Հանրապետության տարածքում, բայց ոչ ավել։ Ըստ էության թուրքական կողմի խնդիրը կայանում է նրանում, որ դրանով ամփոփվի հայերի հատուցման հարցը՝ Ցեղասպանության հետ կապված։ Սա է այն առաջադրանքը, որը Թուրքիայի իշխանությունները դնում են իրենց առջև հայ-թուրքական այս գործընթացի հետ կապված»,-«Առաջին լրատվական»-ի հետ զրույցում ասաց նա։
Մեր զրուցակցի խոսքերով՝ Ռուսաստանը բնականաբար նույնպես շահագրգռված է, որ հայերի հատուցման տրամադրման հարցն այդ շրջանակներից դուրս չգա և երբևիցե չստեղծվի հնարավորություն, որ Հայաստանն անդրադառնա մոսկովյան պայմանագրին, Կարսի պայմանագրին․ «Այսինքն՝ այն միջազգային հարաբերություններին հակասող պայմանագրերին, որոնք 1921 թվականին բոլշևիկյան Ռուսաստանը և քեմալիստական Թուրքիան միմյանց միջև կնքել էին և որոնք որ կիսել էին Հայաստանի տարածքն իրար միջև ու վերացրել էին Հայաստանի անկախությունը»,-«Առաջին լրատվական»-ի հետ զրույցում ասաց նա։
