«Առաջին լրատվական»-ի զրուցակիցն է Հայաստանում Ուկրաինայի նախկին դեսպան Ալեքսանդր Բոժկոն
–Պարոն Բոժկո, վարչապետ Նիկոլ Փաշինյանը, պատասխանելով հարցին, թե ռուս–ուկրաինական հնարավոր բախման դեպքում որը կլինի Հայաստանի դիրքորոշում և ներգրավածությունը՝ որպես ՀԱՊԿ նախագահող երկիր, ասել է, որ Հայաստանը առաջնորդվելու է իր ռազմավարական շահերով, սակայն այս պահին «եթե»-ներով խոսել չի ցանկանում: Նաև հավելել է, որ հույս ունի, թե իրավիճակը չի սրվի և չի լինի ռազմական բախում: Ինչպե՞ս եք գնահատում, կա՞ր նորություն այս հայտարարության մեջ, թե ոչ:
-Իրականում որևէ նորություն չկար նրա մեկնաբանություններում: Ճիշտն ասած, ես սպասում էի, որ ինքը պետք է հստակ դիրքորոշում արտահայտի: Ես այդպես էլ չհասկացա՝ Հայաստանը՝ ի դեմս իր վարչապետ Նիկոլ Փաշինյանի, ինչ դիրքորոշում ունի Ուկրաինայի վերաբերյալ: Փաշինյանն ասում է, որ ինքը կիսում է արտաքին գործընկերների մտահոգությունները, ինչպես նաև արևմտյան գործընկերների մտահոգությունները, սակայն այդ մտահոգությունները բոլորովին տարբեր են: Որովհետև Ռուսաստանը ցուցաբերում է ագրեսիվություն Ուկրաինայի նկատմամբ, պատրաստվում է զորքեր մտցնել, գրավել ուկրաինական տարածքի զգալի մասը, իսկ արևմտյան երկրները դեմ են Ռուսաստանի նման քաղաքականությանը: Վերջիվերջո այն քաղաքականությունը, որը իրականացնում է Պուտինը, նպատակ ունի քայքայելու գոյություն ունեցող միջազգային համակարգը: Եվ Փաշինյանը պետք է հաշվի առնի, որ նման քաղաքականությունը վտանգավոր է նաև Հայաստանի համար, որովհետև Հայաստանն էլ ունի մի հարևան, որը ինչ-որ պահանջներ ունի Հայաստանից և բարձրաձայն խոսում է այդ մասին: Դրա համար այդ ամենը հաշվի առնելով ես կարծում էի, որ պարոն Փաշինյանն ավելի հստակ դիրքորոշում կունենա և կասի թե ինչպես է վերաբերվում Ուկրաինա պետության ամբողջականությանը, որովհետև Ռուսաստանը զորքեր է մտցնում Ուկրաինա, որ գրավի Ուկրաինայի մի զգալի մասը: Բացի դրանից, Փաշինյանը ինչպես է վերաբերվում Եվրոպայի երկրների միջև բարիդրացիական հարաբերություններին, նա նույնիսկ դրանից է խուսափում, քանի որ ամբողջովին Ռուսաստանի արտաքին քաղաքականության հունի մեջ է: Եվ քանի որ Հայաստանը հիմա ՀԱՊԿ համանախագահությունն է ստանձնել, ապա կարելի է ենթադրել, որ նա պետք է ենթարկվի Ռուսաստանի քաղաքականությանը: Եվ իր պատասխանը ռուս-ուկրաինական կոնֆլիկտի մասին ոչ այնքան պատասխաններ է տալիս, որքան հարցեր է առաջացնում, մանավանդ, որ այսօր Ուկրաինայում մոտ կես միլիոն հայ է ապրում: Դու պետք է հստակ դիրքորոշում ունենաս, որովհետև ուզած- չուզած, եթե Ռուսաստանը պատերազմ սկսի Ուկրաինայի դեմ, դա իրենց կաշվի զգալու են նաև Ուկրաինայի հայ քաղաքացիները: Դրա համար ես կուզենայի, որ Նիկոլ Փաշինյանն ավելի հստակ դիրքորոշում ունենար այս հակամարտության առումով, որովհետև այսպես, թե այնպես, այս կոնֆլիկտը վերաբերվում է ամբողջ տարածաշրջանին, այդ թվում Հայաստանին:
Այսինքն Փաշինյանը առնվազն Ուկրաինայի տարածքային ամբողջականության վերաբերյալ հստակ դիրքորոշում պետք է հայտնե՞ր:
Այո, նա պետք է հստակ ասեր, թե ինչպե՞ս է վերաբերվում Ուկրաինայի տարածքային ամբողջականությանն ու սահմաններին: Իր խոսքում դա չի երևում, պարզություն ու հստակություն չկա իր խոսքում: Նա ընդհանուր խոսքեր է ասում, սակայն այդ խոսքերը հակասում են իրար: Մի կողմից նա ասում է, որ կիսում է Արևմտյան Եվրոպայի մտահոգությունները, մյուս կողմից ասում է, որ կիսում է Ռուսաստանի մտահոգություններն Ուկրաինայի վերաբերյալ: Դա այն դեպքում, երբ Ռուսաստանը գրավել է Ուկրաինայի զգալի մասը և կուտակել է իր հսկայական զորքը Ուկրաինայի սահմանների երկարությամբ:
